Жарыс барысында шаңғы таяғы сынғанына қарамастан, ол соңына дейін күресіп, жоғары орынға ие бола алды, деп хабарлайды @Pavlodarnews.kz.

21 қыркүйекте Италияның Валь-ди-Фьемме қаласында өткен шаңғы роллерінен Әлем кубогының кезеңінде павлодарлық жас спортшы, Железин балалар-жасөспірімдер спорт мектебінің тәрбиеленушісі 17 жастағы Вадим Козлов керемет нәтиже көрсетті.

Еркін стильде 10 шақырымдық масс-старт жарысында Вадим мәреге 6-орынмен келіп, көшбасшыдан небәрі 6,7 секундқа ғана қалып қойды. 

Вадим Козлов  – 2024 жылдың қыркүйегінен бастап Қазақстан жасөспірімдер құрамасының мүшесі. Ол шаңғы жарысынан спорт шеберлігіне кандидат атағына ие және еліміздегі ең үздік жас спортшылардың бірі ретінде танылып жүр.

Вадим – республиканың бірнеше чемпиондар мен Олимпиада қатысушыларын тәрбиелеген аты аңызға айналған Кисляковтар әулетінің шәкірті. Бұл жетістігі оның спорттық мансабындағы ең маңызды кезеңдердің бірі деуге болады.