Шымкентте 16–30 тамыз аралығында Shymkent Shooting Plaza атыс кешенінде нысана көздеу бойынша XVI Азия чемпионаты өтті, деп хабарлайды @Pavlodarnews.kz.

Чемпионатқа Азияның 26 елінен 800-ге жуық спортшы қатысты. Атап айтқанда, Бахрейн, Вьетнам, Гонконг, Үндістан, Иран, Индонезия, Қазақстан, Катар, Қытай, Кувейт, Ливан, Қырғызстан, Малайзия, Моңғолия, Біріккен Араб Әмірліктері, Оман, Пәкістан, Сауд Арабиясы, Сингапур, Тәжікстан, Тайбэй, Түркіменстан, Өзбекстан, Филиппин, Оңтүстік Корея және Жапония елдері болды.

Спортшылар 10 метрге пневматикалық тапанша, 25 және 50 метрге тапанша, 10 және 50 метр винтовкадан оқ ату, қозғалмалы нысанаға ату жаттығулары бойынша бақтарын сынады. 

Жарыстар жеке және командалық есепте өткізілді. Барлығы 700-ден астам медаль сарапқа салынды.

Павлодар облысының ЖСШМ спортшысы Кирилл Федькин юниорлар арасында тамаша нәтиже көрсетіп, түрлі дәрежедегі 7 медаль жеңіп алды.

Сонымен қатар, Кирилл халықаралық дәрежедегі спорт шебері нормативін орындады. Чемпионаттың Қазақстанда өткізілуі — елдегі оқ ату спортын дамытуға және Азия елдері арасындағы спорттық ынтымақтастықты нығайтуға бағытталған маңызды оқиға болып табылады.