Қонаев қаласында велосипедпен тау жарысы бойынша Қазақстан Республикасының қысқы чемпионаты өтуде, деп хабарлайды @Pavlodarnews.kz тілшісі.

ҚР Велосипед спорты федерациясының мәлімдеуінше, чемпионат жасөспірімдер арасында да жеке өтуде. Павлодар облысынан 3 спортшы қоржынға 6 медаль салып үлгерді. 

Тау жарысының XCP (кросс-кантри) түрі бойынша әйелдер арасында павлодарлық Татьяна Генелева алтын медаль жеңіп алса, ерлер арасында Егор Карасёв күміске қол жеткізді.

XCC (кросс-кантри шорт-трек) түрінен Татьяна Генелева мен Егор Карасёв екеуі де күміс медаль олжалады. Жарыстың бұл түрінен жасөспірімдер арасында павлодарлық Вячеслав Климеров та күміс медаль еншіледі. 

Сондай-ақ жасөспірімдер арасында Вячеслав Климеров жарыстың XCE (кросс-кантри элиминатор) түрінен алтын медаль иегері атанды. 

Айта кетейік, тау жарысы бойынша Қазақстан Республикасының қысқы чемпионатына 100-ге жуық спортшы қатысуда.

Фото: ашық дереккөздерден