Жастар жұмысшыларға ыстық тамақ пен шай ұсынды, деп хабарлайды @Pavlodarnews.kz тілшісі.

«AMANAT» партиясы қалалық филиалының мәлімдеуінше, «Жастар рухы» жастар қанаты және 5512 әскери бөлімімен бірлесіп  «Бірге жылырақ!» ақциясын өткізді.

Шара аясында қала жастары қар, мұз, қоқыстарды шығаруға жұмылдырылған коммуналдық қызметкерлерге ыстық тамақ пен шай таратуды ұйымдастырды.

– Акцияның мақсаты – күннің суығы мен аязда қаламыздың тазалығын қамтамасыз ететін жандарға қолдау көрсету, – дейді партияның қалалық филиалының атқарушы хатшысы Сүлеймен Сыздықов.

Күн сайын Павлодар көшелерінде 200-ден астам жұмысшы екі ауысыммен еңбек етеді. Қысқы маусым басталғалы облыс орталығының көшелерінен 190 мың тоннаға жуық қар шығарылды. Коммуналдық қызметтердің жұмысы тәулік бойы жүргізілуде.