Қайырымдылық акциясы 26 сәуір күні өтеді, деп хабарлайды @Pavlodarnews.kz тілшісі.

Облыстық білім беру басқармасы баспасөз қызметінің мәліметінше, пластик қақпақтарды жинау арқылы онкологиялық дертке шалдыққан балаларға көмек көрсетуге мүмкіндік бар. Ұйымдастырушылар кез келген адамның игі іске атсалысып, науқас балалардың еміне қолдау білдіре алатынын айтады.

Акцияның басты мақсаты – пластик қалдықтарын қайта өңдеуге өткізіп, түскен қаражатты онкологиялық дертке шалдыққан балалардың еміне жұмсау. Әрбір жиналған қақпақ – кішкентай науқастардың сауығуына жасалған қадам.

– Қақпақ жинау – өте қарапайым, бірақ аса маңызды көмек. Жиналған қақпақтар онкологиялық дертке шалдыққан балалардың еміне қаражат бөлуге мүмкіндік береді. Әр адамның үлесі үлкен маңызға ие, өйткені әрбір жиналған қақпақ балаларға болашаққа деген үміт сыйлай алады. Біз бірге көп нәрсе жасай алатынымызға сенеміз! – дейді ұйымдастырушылар.

Қақпақтар 26 сәуір күні сағат 9:00-ден 11:00-ге дейін қабылданады. Жинау орны: М. Жүсіп көшесі, 27, М. Катаев атындағы Оқушылар сарайы.

Қала тұрғындары мен қонақтары бұл игі іске атсалысып, балаларға көмек қолын созуға шақырылады.