Жоба инвесторлардың қаражатына жүзеге асырылады, деп хабарлайды @Pavlodarnews.kz тілшісі.

Павлодар облысының кәсіпкерлер палатасы «Aibarys Ltd» май өндіру зауытының құрылысы бойынша инвестициялық жобаның іске асырылуын бақылауды жалғастыруда. Шарбақты ауданындағы Құрқамыс станциясында орналасатын болады. Ол 2025 жылдың қыркүйегінде аяқталуы керек.

Жоба өткен жылы жүзеге асырыла бастады. Сол үшін 25 миллиард теңге қажет болды. Іске Болат Садық инвестиция жасап, қаржыны мемлекеттік Қытай даму банкі арқылы алған.

– Компания Павлодар облысындағы инвестициялық жобалардың жалпы республикалық пулына және интерактивті инвестициялық картаға енгізілген, – деді Павлодар облысы кәсіпкерлер палатасының директоры Ерқанат Әбенов.

Аумағы 29 гектарды құрайтын учаскеде бас магистральдан болашақ кәсіпорынға дейінгі ұзындығы 1647 метр темір жолы толығымен төселді. Жарықтандыру орнатылған қоршаулар мен тіректер қойылды. Нысан су құбырына да қосылған.

Зауыттың жылына 121 мың тоннаға дейін май өндіреді деп күтілуде. Өнім ішкі және Қытай нарығына сатылады.