2024 жылдың желтоқсан айының соңында Шұға және Шілікті ауылдарында бірнеше нысан іске қосылады, деп хабарлайды  @Pavlodarnews.kz тілшісі.

Ақтоғай ауданының әкімі Қаршыға Арынов жұмыс сапарымен аталған екі ауылды аралап қайтты.

– Шұға ауылында су құбырының құрылысы аяқталуға жақын. Қазіргі уақытта сорғы станциясын іске қосу жұмыстары жүргізілуде, – деп жазды Қаршыға Арынов Іnstagram парақшасында. 

Шұға ауылындағы медициналық пункттің құрылысы соңғы сатысында. Ішкі әрлеу жұмыстары аяқталып, қажетті жабдықтар жеткізілген, аумақты абаттандыру жұмыстары жалғасуда. Қос нысанды 2024 жылдың желтоқсан айының ортасында іске қосу көзделіп отыр. 

Сондай-ақ Шілікті ауылында да медициналық пункттің құрылысы жалғасуда. Қазіргі уақытта электрмонтаждық жұмыстар жүргізілуде, құрылыс биыл жыл соңында аяқталмақ. Бұдан бөлек, ауылдың  кірме жолына қиыршықтас төсеу жұмыстары белсенді жүргізілуде. Бұл жұмыстардың аяқталуы 15 желтоқсанға жоспарланған.