Халыққа алаяқтықтың жаңа түрі туралы ескерту жасалып жатыр, деп хабарлайды @Pavlodarnews.kz тілшісі.

Павлодарлық көпқабатты үйлердің чаттарында өздерін Ішкі істер министрлігінің қызметкерлеріміз деп таныстырған бір топ адам пәтерлерді аралап жүргені туралы хабарлама тарады.

– Олардың қолында Ішкі істер министрлігінің рәміздерімен құжаттары бар. Алдағы «халық санағы» қарсаңында барлық тұрғындардың куәліктерінің бар-жоғын тексеріп, биометриялық мәліметтерді алу қажеттігін алға тартып отыр. Олар сіздің фотосуретіңізді, саусақ ізіңізді түсіру ниетін білдіреді. Өзімен ноутбук, биометриялық құрылғыны және тұрғындардың тізімін алып жүреді, – делінген хабарламада.

Хабарламада айтылғандай, осы алаяқтар бланкілерді таратып, жеке ақпаратты жазуға сұрайды.

– Үкімет тарапынан мұндай бастамалар жоқ екенін еске саламыз. Ешқандай биометриялық деректерді бермеуіңізді сұраймыз! Есікті ашпаңыз! Оларды үйге кіргізбеңіз! Олар ұрлық пен алаяқтық жасауы мүмкін! – деп тұрғындарды ескертуде.

Үй тұрғындардан бұл хабарламаны чаттарға жіберу сұралады.

Павлодар облысының полиция департаментінің баспасөз қызметі павлодарлықтар арасындағы таралып тұрған осы хатқа жауап берді.

– Бұл фейк. Егер ақпарат бізден таралатын болса, алаяқтықтың бұл түрі бар екенін өзіміз де азаматтарды ескертетін едік, – деп түсіндірді ведомствода.

Естеріңізге сала кетейік, биыл үй тұрғындарының чатына кіру үшін үйлердің кіреберісіне QR коды бар парақшалар ілінген. QR кодпен өту арқылы адамдардың жеке деректері алаяқтарға үшін қолжетімді болар.

Фото: автор