Ол 1 тамызда басталып, 31 тамызда аяқталады, деп хабарлайды @Pavlodarnews.kz тілшісі.

Облыстық статистика департаментінің мәліметінше, санаққа қатысушылар sanaq.gov.kz сайтында онлайн түрде жауап бере алады. Онда  ауыл шаруашылығы өндірушілеріне және жеке үй шаруашылықтарына арналған екі түрлі сауалнама нұсқасы болады.

Өсімдік шаруашылығы, мал шаруашылығы немесе балық шаруашылығымен айналысатын заңды тұлғалар, жеке кәсіпкерлер мен шаруа қожалықтары 2-АШК/ШФҚ нысанын толтыруы керек.

– Бұл форма тоғыз бөлімнен тұрады, барлығы 29 сұрақ бар, – деді ведомствода. – Онда жер телімдерінің көлемі, олардың қалай пайдаланылатыны, суару тәсілдері, жердің меншік немесе жалға алынғаны туралы мәліметтер көрсетілуі тиіс.

Сондай-ақ, үй шаруашылығында бар мал, құс және балықтың саны, қолда бар техника, жабдықтар, қоймалар мен басқа да өндірістік құрылымдар туралы сұрақтар бар.

Қатысушылар тыңайтқыштарды, өсімдікті қорғайтын құралдарды қолдану, органикалық өнім өндіру, ауыл шаруашылығы өнімдерін сату, сондай-ақ жұмысшылардың саны мен сипаттамалары туралы да ақпарат беруі тиіс.

Егер шаруашылық бірнеше өңірде жұмыс істесе, әр өңір бойынша жеке нысан толтырылып, нақты орналасқан жері, егіс алқаптары, мал мен құстың саны көрсетілуі керек.

Сонымен қатар, егін егіп, мал мен құс ұстайтын жеке үй шаруашылықтары да санаққа қатысады. Олар 3-ЖҚШ сауалнамасын толтырады. Онда қандай дақылдар өсірілетіні, мал мен құстың саны, жайылымдардың пайдаланылуы, мал ұстайтын қора-жайлардың бар-жоғы, өнімнің сатылатыны немесе өз қажетіне жұмсалатыны туралы көрсетіледі.

Үй шаруашылықтарына арналған сауалнама сегіз бөлімнен және 22 сұрақтан тұрады.

Барлық берілген ақпарат қатаң құпия сақталады, ол «Мемлекеттік статистика туралы» заңмен қорғалған және салық немесе басқа органдарға берілмейді.