Облыс әкімі өңір қаржыландыруының жеткіліксіздігіне назар аударды, деп хабарлайды @Pavlodarnews.kz тілшісі.

Павлодар облысының әкімі Ақсуда өткен жиналыста қаланы күзге және қыстың қамына дайындауда басты назар аудару керек мәселелерді айқындады. Атап айтқанда: жол жөндеу жұмыстары, көгалдандыру, коммуналдық қызметтердің үздіксіз жұмысын қамтамасыз ету.

Асайын Байхановтың пікірінше, жолдағы шұңқырларды жөндеуге бұрын бөлінген 90 миллион теңге қаражат орталық көшелер мен қоғамдық көлік жүретін магистральдарды толық жөндеуге жетпейді. Осы орайда соманы ұлғайтуды шешті, алайда жұмыстар сапасына да көбірек көңіл бөлуді талап етті.

– Шұңқырларды арнайы фреза арқылы кесу керек, мердігердің тиісті жабдықтары мен сертификаттары болуы тиіс. Әсіресе гидравликалық сынақтар мен қазбалардан кейін зардап шеккен учаскелерді мұқият жоспарлаңыздар,  – деп ескертті облыс әкімі тұрғын үй-коммуналдық шаруашылық бөлімінің басшысына. 

Өңір басшысы күзгі ағаштарды қырқу көлемін арттыруды тапсырды: орталық көшелер бойындағы құрғақ бұтақтарды алып тастап, төменгі бұтақтардың жаяу жүргіншілерге кедергі келтірмеуі қажет.

Ақсуда аулаішілік тазалыққа жаңа конкурс жариялау жоспарлануда, ал қазіргі мердігер міндеттерін орындамағандықтан келісімшарт бұзылмақ. Аулаішілік абаттандыруға 90 миллион теңге бөлінген, оның жартысы ғана пайдаланылған. Экономикалық тергеу департаменті келісімшарттар мен атқарылған жұмыстар көлемін тексереді. Өңір басшысы қаржыландыруды 200 миллионға дейін арттыруды ұсынды.

Сонымен қатар, қаладағы шөп шабуды бір келісімшартқа біріктіру міндеті қойылды, бұл бақылауды жеңілдетеді.

– 1 қыркүйекке дейін әсіресе мектептер маңындағы жаяу жүргіншілер өткелдерін жаңарту керек. Комиссияларға әлеуметтік нысандар жанындағы жол белгілерін тексеріп, қажет болса ауыстыру тапсырылды, – деп бұйырды облыс әкімі. 

Асайын Байханов қалаларда көгалдандыру, жолдарға күтім, сапалы жарықтандыру және жұмыс істеп тұрған қоғамдық көлік арқылы жайлы орта қамтамасыз етілуі тиіс екенін еске салды. Барлық коммуникациялар – жылу, су, кәріз, электр және интернет  үздіксіз жұмыс істеуі қажет.