Шара сенім мен бірлік орнатуға, жастарды қоғамдық өмірге тартуға бағытталды, деп хабарлайды @Pavlodarnews.kz тілшісі.

Халықаралық жастар күні қарсаңында Ақтоғай жазғы лагерінің базасында «Жас қанат» жастар ресурстық орталығы ұйымдастырған тимбилдинг форматындағы жастар кездесуі өтті. 

– Мақсат – жастарды жай ғана көңіл көтеру үшін емес, сенім мен бірлік атмосферасын қалыптастыру, оларды қоғамдық маңызы бар үдерістерге тарту, – деді ұйымдастырушылар.

Іс-шараны Ақтоғай ауданы ішкі саясат және тілдерді дамыту бөлімінің басшысы Дархан Рамазанов ашып, жастардың ел болашағы ғана емес, қазіргі қоғамды белсенді қалыптастырып отырған негізгі күш екенін атап өтті.

– Күн бағдарламасы бірнеше тақырыптық алаңды қамтыды. Тамыз айындағы маңызды мерейтойларға – ұлы ойшыл, ақын Абай Құнанбайұлының 180 жылдығына және Қазақстан Республикасының Конституциясының 30 жылдығына айрықша назар аударылды. Орталық кітапхана қызметкерлері бұл тарихи оқиғалардың маңызы туралы қызықты әрі түсінікті түрде әңгімелеп, Абайдың өмірі мен шығармашылығына арналған зияткерлік викторина өткізді, – деді аудандық ішкі саясат бөлімінің баспасөз қызметі.

«Заң және тәртіп» атты құқықтық алаңда жастардың құқықтық сауаттылығы мен азаматтық жауапкершілігін арттыруға бағытталған сұхбат өрбіді. Мұнда құқықбұзушылықтың, сыбайлас жемқорлықтың және діни экстремизмнің алдын алу мәселелері талқыланды. Жастар белсенді түрде пікір білдіріп, сұрақтар қойып, өз ойларымен бөлісті.

Спорт алаңында волейбол, арқан тарту және дәстүрлі «Көңілді старт» ойындары ұйымдастырылды. Бұл жарыстар күш пен ептілікті сынап қана қоймай, нағыз командалық жұмыстың мектебіне айналды.

Мереке соңында жеңімпаздар мен жүлдегерлер марапатталып, «Жасыл ел» жазғы еңбек жасағының белсенділері алғыс хаттармен және естелік сыйлықтармен ынталандырылды.

Күн достық дастарқанында аяқталып, қатысушылар әсерлерімен бөлісіп, алдағы жоспарларын талқылады.

Ұйымдастырушылардың айтуынша, мұндай кездесулер – жастарды тәрбиелеудің, олардың белсенділігін арттырудың маңызды бөлігі. Өзара түсіністік, белсенділік, тарих пен заңға құрмет – осы құндылықтар жастар алаңында ерекше айқын сезілді.