Бүгінде медициналық ұйымда ішкі әрлеу жұмыстары жүруде, деп хабарлайды @Pavlodarnews.kz.

Ақтоғай ауданының әкімі Қаршыға Арынов жұмыс сапарымен Қараоба ауылдық округіне барып, салынып жатқан нысандарды аралады. Соның ішінде Әуелбек ауылындағы дәрігерлік амбулаторияны тексеріп шықты.

– Ол жерде ішкі әрлеу жұмыстары жүргізілуде. Мердігерлер нысанды желтоқсан айының ортасына дейін пайдалануға беруді жоспарлап отыр,– деп жазды аудан әкімі өзінің жеке парақшасында.

Ал Әуелбек ауылындағы мәдениет үйінде газ жабдығы мен ішкі жылыту жүйесін орнату бойынша жұмыстар аяқталуда. Нысан 1 желтоқсанда салтанатты түрде ашылады деп көзделуде. 

Сондай-ақ, дене шынықтыру-сауықтыру кешенінің құрылысы кестеден уақытша ауытқып кетті. Алайда мердігерлер жұмыстарды биылғы жылдың соңына дейін аяқтауға уәде берді. Қазіргі уақытта ішкі әрлеу жұмыстары жүргізілуде.