Оны аудандық полиция бөлімінің қызметкерлері тоқтатқан, деп хабарлайды @Pavlodarnews.kz тілшісі.

Аудандық сот баспасөз қызметінің мәліметінше, ағымдағы жылдың қаңтар айында аудан тұрғыны масаң күйде Хмельницкое ауылында «Chevrolet Cobalt» маркалы автокөлігін жүргізген.

– Сот отырысында әйел сағат 20:00 шамасында үйінде болып, үш стақан коньяк ішкенін, содан кейін дүкеннен балмұздақ алу үшін көлікке отырғанын түсіндірді. Ол өз кінәсін мойындап, өкінетінін айтты және соттан көлік құралын басқару құқығынан айырмауды сұрады, – делінген хабарламада.

Медициналық куәландырудың қорытындысына сәйкес, әйелдің алкогольдік масаңдықтың жеңіл дәрежесінде болғаны анықталды.

Аудандық сот құқық бұзушыны кінәлі деп танып, оны 7 жыл мерзімге көлік құралдарын басқару құқығынан айыру және 15 тәулікке әкімшілік қамауға алу жазасын тағайындады.

Қаулы заңды күшіне енді.