Қала әкімдігі барлық жанармай бекеттерін тексеретін болады, деп хабарлайды @Pavlodarnews.kz.

Екібастұз қаласы әкімдігінің мәліметінше, Қонаев көшесіндегі шыққан өрт бойынша арнайы бақылау тобы құрылып  23 жанармай құю станциясы, 11 автогаз бекеттерін тексеретін болады.  

– Бақылау тобының құрамына Екібастұз қаласы Төтенше жағдайлар басқармасының басшысы, жергілікті полиция қызметінің бастығы, кәсіпкерлік, жер қатынастары, тұрғын үй инспекциясы, сәулет бөлімдерінің, мемлекеттік кірістер және санитарлық-эпидемиологиялық бақылау басқармаларының басшылары кірді. Құрылған топ бүгіннен бастап жұмысқа кірісті, – делінген хабарламада. 

Сондай-ақ,  ҚР ҚҚ 281-баптың (Жарылыс қаупi бар объектiлерде қауiпсiздiк қағидаларын бұзу) 2-бөлігі  және 292-баптың 2-бөлігі (Абайсызда адамның өліміне әкеп соқтырған өрт қауіпсіздігі ережелерін бұзу) бойынша қылмыстық істер қозғалды.

Еске сала кетейік, Екібастұз қаласында 13:24 автогаз бекеті жанған.  Өртті 15:44 сөндірді. Станцияда болған 17 жасар бала өрттің салдарынан мерт болды. Қазіргі таңда өрттің себептері анықталуда.

Фото: Константин Шелков