Билет бағасы қаңтарда өткен жылдың осы айымен салыстырғанда тоғыз пайызға өскен, деп хабарлайды @Pavlodarnews.kz. 

Finprom.kz сарапшыларының мәліметіне сүйенсек, Қазақстанда кинотеатрлардың қызметтері 8,7 пайызға, театрлардың қызметтері 4,7 пайызға қымбаттады. Бағаның ең жоғары өсімі Қарағанды облысында тіркелді – 28 пайыздан астам. Ұлытау және Батыс Қазақстан облыстарында өсім бір пайыздан аспады. 

Шымкентте және Атырау облысында мәдени іс-шаралар саласындағы қызметтердің бағасы өткен жылдың деңгейінде қалды. Павлодар облысында үш пайызға ғана өскен. Мәселен, Ж. Аймауытов атындағы облыстық қазақ музыка-драма театрында бірінші қатарға билет бағасы – 1300 теңге, келесі қатарға мың теңге тұрады. А. П. Чехов атындағы облыстық драма театрында спектакль көру мың теңгеге шығады. 

Киноға бару үшін күндізгі сессияға кемінде 1400 теңге және кешкі сессияға 1500 теңге қажет. Мұражайларға билеттер әлдеқайда арзан – 100 теңгеден басталады. Халықаралық әйелдер күнінде қыз-келіншектер  көрмелер мен спектакльдерге тегін бара алады.

Қазақ музыкалық-драма театрында Карло Голдонидің пьесасы негізінде «Венециандық егіздер» комедиясы қойылады. Басталуы –сағат 17:00-де. 

Чехов атындағы облыстық драма театрында Сергей Беловтың шығармасы бойынша «Мамуля» комедиясы көрсетіледі. Спектакль сағат 18:00-де басталады.