Ол алдын ала төлем алып, тауарларды жібермеген, деп хабарлайды @Pavlodarnews.kz.

Ақпараттық технологияларды қолдану арқылы жасалатын қылмыстардың алдын алуға бағытталған «Hi-Tech» жедел-алдын алу іс-шарасы барысында Павлодар облысының полицейлері интернет-алаяқтық жасады деген күдікпен ер адамды ұстады.

– Тергеу барысында күдіктінің электронды темекілерді сату мақсатында Telegram арнасын ашқаны  анықталды. Алғашында ол сатып алынған тауарларды шынымен жіберіп, сатып алушылардың сеніміне кірген. Алайда кейін тауар қоры таусылған кезде ер адам алдын ала төлем қабылдауды жалғастырып, тауарды жібермей қойған. Алынған ақшалай қаражатты ол жеке мақсаттарына пайдаланған. Қазіргі уақытта күдіктіге қатысты алаяқтық фактісі бойынша сотқа дейінгі тергеу жүргізілуде, – деді облыстық полиция департаменті баспасөз қызметінде.

Тәртіп сақшылары азаматтарды сақ болуға шақырады. Күдікті хабарламалар немесе телефон қоңыраулары, соның ішінде әлеуметтік желілер арқылы келіп түскен жағдайда, дереу полицияға жүгіну ұсынылады.