Құтқарушылар дауыл туралы ескерту алған кезде сапарды кейінге қалдыруды және ауа райының жақсаруын күтуді сұрайды, деп хабарлайды  @Pavlodarnews.kz тілшісі.

Облыстық ТЖД баспасөз қызметінің мәліметінше, Қарағанды және Ақмола облыстарында ауа райының нашарлауына байланысты Қызылорда-Павлодар республикалық манызы бар автожолдың Шідерті кентінен Қарағанды облысының шекарасына дейін учаскесінде (1206-1135 ш) және Астана-Ерейментау-Шідерті республикалық манызы бар автожолдың Шідерті кентінен Ақмола облысының шекарасына дейін учаскесінде (205-259 ш) көліктің барлық түрлері үшін жол жабық.

– Бұрқасын жағдайында жол-көлік қозғалысы қиындап, көріну нашарлайды. Алыс жолға шықпас бұрын «Дәрмен» мобильді қосымшасы арқылы жоспарлаған бағыттағы жолдың ашық екеніне көз жеткізу керек. Сондай-ақ төтенше жағдайлар кезінде және шұғыл көмек көрсету қажет болған жағдайда құтқару қызметіне 112 нөмірі бойынша қоңырау шалу қажет, – дейді департаментте.

Қазгидромет филиалының ақпараты бойынша 30 желтоқсанда Павлодар облысының солтүстігінде,  шығысында бұрқасын күтіледі. Оңтүстік-батыстан жел соғады, күші 15-20, түнде екпіні 23-28 м/с күтіледі.