Соңғы бес жылда елде аталмыш өнімнің өндіріс көлемі үштен бірге өсті, ал он жыл ішінде екі есеге жуық артты, деп хабарлайды @Pavlodarnews.kz.

Energyprom.kz сайтының ақпараты бойынша, өңірлік тұрғыда 2025 жылдың тамыз айында шұжық және басқа да ет өнімдерінің бағасы ең көп өскен аймақ Ақмола облысы болды: бірден 22,5%-ға.

Сонымен қатар, айтарлықтай қымбаттау Шымкентте (20,2%), Ұлытау облысында (19,6%) және Павлодар облысында (18,4%) тіркелді.

Баға өсімі ең аз байқалған өңірлер қатарындаАлматы облысы (3,3%), Алматы қаласы (7,2%) және Ақтөбе облысы (7,4%) бар.

Тамызда қайнатылған шұжықтың орташа бағасы 1 келі үшін 3256 теңгені, ал жартылай ысталған шұжықтың бағасы — 3862 теңгені құрады.

2025 жылдың қаңтар–шілде айларында Қазақстанда 44,5 мың тонна шұжық, ет өнімдері мен мал қаны негізіндегі ұқсас өнімдер өндірілді. Өткен жылдың сәйкес кезеңімен салыстырғанда өндіріс көлемі бірден 13,8%-ға артты.

Былтыр қаңтар–маусым айларының қорытындысы бойынша, жергілікті компаниялар сұранысты  63,9 пайызға қамтамасыз етті. Осы кезеңде елде 37,5 мың тонна шұжық өнімі өндірілді – бұл 2024 жылдың бірінші жартыжылдығымен салыстырғанда 14,2 пайызға артық.

2025 жылдың тамыз айының қорытындысы бойынша Қазақстанда шұжық және ет өнімдерінің бағасы бір айда 2,1%-ға қымбаттады – бұл жыл басынан бері ең жоғары айлық өсім.

Жылдық есеп бойынша баға бірден 13,1 пайызға өсті. Салыстырмалы түрде алғанда: 2024 жылдың тамызында өсім 4,9% болған, 2023 жылы — 11,1%, ал 2022 жылы — 16,2%.

Айта кету керек, шұжық өнімдеріне бағаның күрт өсуі еттің жалпы бағасының айтарлықтай өсуімен қатар жүрді: бір жыл ішінде 17,6%-ға қымбаттады. Соның ішінде қазақстандықтар жиі тұтынатын сиыр еті бірден 24 пайызға өсті. Сонымен қатар, ішкі нарықтағы еттің сатылым көлемі 0,5 пайызға азайды.