Көлік жүргізу кезінде телефон пайдаланғаны үшін бес АЕК мөлшерінде айыппұл қарастырылған, деп хабарлайды @Pavlodarnews.kz тілшісі.

Павлодар облысы полиция департаментінің мәліметінше, 2026 жылдың басынан бері көлік жүргізу кезінде ұялы телефонмен сөйлескен 3084 жүргізуші әкімшілік жауапкершілікке тартылды.

Полицейлер телефонмен сөйлесу немесе мессенджерлерді пайдалану жүргізушінің назарын жолдан бөліп, жол-көлік оқиғасының қаупін арттыратынын ескертті.

– Көлік жүргізу кезінде телефонмен сөйлесуге тыйым салынғаны баршаға белгілі. Дегенмен жол тіпті болмашы қателіктерді де кешірмейді. Нәтижесінде уақытты үнемдеуге деген қарапайым ниет адам өміріне қауіп төндіруі мүмкін, – деп атап өтті полиция департаментінде.

Көлік құралын басқару кезінде телефонды немесе радиостанцияны пайдаланған жүргізушіге бес АЕК мөлшерінде айыппұл салынады.

Егер жүргізуші әкімшілік жаза қолданылғаннан кейін бір жыл ішінде құқық бұзушылықты қайталаса, айыппұл мөлшері 10 АЕК-ке дейін өседі.

Полиция бұл талаптар жүргізушілердің, жолаушылардың және басқа да жол қозғалысына қатысушылардың қауіпсіздігін қамтамасыз етуге бағытталғанын еске салды.