Әр қала мен ауданда ағаштар отырғызылды, деп хабарлайды @Pavlodarnews.kz.

«Таза Қазақстан» республикалық акциясы аясында өңір тұрғындары туған өлкені абаттандыруға белсенді қатысты. 25 сәуірде «Жасыл аймақ» апталығы аясында облыста 565 түрлі көшет – қарағай, мамыргүл және қайың отырғызылды.

Көшет отырғызуға жұртшылық, ардагерлер, жастар, этномәдени бірлестіктер, депутаттар, үкіметтік емес ұйымдар, білім өкілдері қатарынан 300-ден астам адам қатысты.

Мысалы, Шарбақты ауданының Шалдай ауылында «Отбасы ағашы» сынды ерекше акция ұйымдастырылды. Онда 40 жылдан астам балалары мен немерелерімен бірге өмір сүрген бес отбасының мүшелері қылқан жапырақты ағаштардың 50 көшетін отырғызды.

Екібастұз қаласының интернационалист-жауынгерлер паркінде 50-ден астам тұрғын экологиялық акцияны қолдап, тазалыққа өз үлестерін қосты. Ардагерлер, депутаттар, этномәдени бірлестіктер, спортшылар, жастар және қала еріктілері 100 көшет отырғызды.

Ақтоғай ауданында Ауғанстаннан әскер шығарылғанына 35 жыл толуына орай Ауған соғысы ардагерлеріне арналған саябақта 35 көшет отырғызылған болатын. Тұрғындар үшін концерт ұйымдастырылып, ыстық шай мен бауырсақ таратылды.

Ал облыс орталығында Аула тұрғындары, қалалық мәслихат депутаты Гүлзира Атабаева, қаланың белсенді жастары және ЖБДО еріктілері Павлов көшесі, 93/1, Ломов көшесі, 154/3, Павлов көшесі, 96/5, Ломов көшесі, 152/2, Ломов көшесі, 156/2 мекенжайы бойынша 40 жас қайың отырғызды.

– Бұл жұмыстар болашақта қаламыздың экологиясына үлес қоссын деген ниетпен атқарылуда, – дейді әлеуметтік жобалар қорының басшысы Ербол Кеңгербаев.

«Таза Қазақстан» республикалық экологиялық акциясына Баянауыл ауданы да өз үлесін қосты. Баянауылдықтар жас қарағайдың жүз түп көшетін отырғызды.

 – Мұндай іс-шараларды ұйымдастыру өңірдегі экологияны одан әрі жақсартуға, елді мекендерді көгалдандыруға ықпал ететін болады. Барлық тұрғындарды қоршаған ортаны көгалдандыруға қатысуға шақырамын, - деді Қайрат Сарбасов.

Бұдан бөлек Ақсу шағын ауданы саябағында 100 түп мамыргүл мен 40 түп қарағай ағашы отырғызылды.