Павлодар облысында дәстүрлі «Мектепке жол» қайырымдылық акциясы басталды, деп хабарлайды @Pavlodarnews.kz тілшісі.

Тамыз айында басталып, қыркүйек айының соңына дейін жалғасатын «Мектепке жол» жобасы аз қамтылған және көпбалалы отбасылардың балаларына, сондай-ақ жетім және ата-анасының қамқорлығынсыз қалған балаларға жаңа оқу жылына дайындалуға көмектесуге бағытталған.

Облыстық білім басқармасының мәліметінше, биыл қайырымдылық акциясына үш мыңнан астам баланы қамту жоспарланып отыр. Қазірдің өзінде олардың 500-ден астамы демеушілік көмек алған. Көрсетілген көмектің жалпы сомасы 12 миллион теңгеден асты. Қолдау отбасының әлеуметтік жағдайы мен баланың қажеттіліктері ескеріле отырып, атаулы түрде көрсетіледі.

Жыл сайын көмек алушылардың саны артып келеді. Соңғы үш жылда акцияның қамту ауқымы 1,5 есеге өскен. 2023 жылы демеушілер 1970 баланың мектепке дайындалуына қаржылай қолдау көрсетсе, былтыр бұл көрсеткіш 2250 балаға жеткен.

– Игі бастамаға өңірдегі ірі және қала құраушы кәсіпорындар, кәсіпкерлер, ұйымдар, сондай-ақ жанашыр тұрғындар белсенді түрде қосылып келеді. Олардың қолдауының арқасында балалар мектеп формасымен, қажетті оқу құралдарымен және жаңа оқу жылына дайындыққа қажетті басқа да заттармен қамтамасыз етіледі, – деп хабарлады ведомствода.

Мұндай оқушылардың тізімін мектептер қалыптастырады. Тізімге ену үшін ата-аналарға сынып жетекшісіне, мектеп әкімшілігіне немесе тұрғылықты жері бойынша білім бөліміне жүгіну жеткілікті. Өтініш қабылдау туралы арнайы хабарландыруды күтудің қажеті жоқ.

– Қажет болған жағдайда отбасы көмекке мұқтаж екенін растайтын өтініш пен тиісті құжаттарды ұсынады, – деп түсіндірді басқармада.

Демеушілер мектеп формасын, аяқ киім, мектеп сөмкелерін, кеңсе тауарларын, сертификаттарды сатып алып, оларды нақты балаларға тікелей немесе мектеп арқылы табыстай алады. Қалауы бойынша аталған заттарды мектепке немесе білім бөліміне қалдыруға болады. Кейін олар мұқтаж оқушылар арасында бөлінеді.