Аймақ басшысы жаңа құрамға бірқатар талаптар қойды, деп хабарлайды @Pavlodarnews.kz тілшісі.

Өткен жылдың 23 желтоқсанында облыстық қоғамдық кеңестің үшінші құрамының үш жылдық өкілеттігі аяқталды, сондықтан облыстық мәслихат 33 адамнан тұратын жаңа құрам жасақтау үшін жұмыс тобын құрды. Жаңартылған кеңестің төрағалығы қоғам және саяси қайраткер Бәкір Демеуовке тапсырылды.

Облыстық мәслихат төрағасы Илья Теренченконың айтуынша, бұл жолы кеңесте мәслихат депутаттары іс жүзінде жоқ, себебі осы екі орган ұқсас жұмыстарды атқарады.

– Төртінші қоғамдық кеңестің жартысынан астамы жаңарды. Кеңес құрамына облыстың барлық қалалары мен аудандарының өкілдері кірді. Таңдалғандардың жасы 56-дан 45-ке дейін түсті, яғни құрам жасарған. Сондай-ақ, біз өте маңызды гендерлік мәселені байқадық, жалпы құрамның 30 пайызын құрайтын 11 әйелді сайладық, – деді Илья Теренченко.

Сондай-ақ, облыстық мәслихат қоғамдық кеңес комиссияларының профилін әлеуметтік желілерде тұрғындар көтерген мәселелердің барлығы комиссия жұмысының тақырыбына толық сәйкес келетіндей етіп өзгертуді ұсынды. Сонымен, құрылыс, экономика, жер қатынастары, білім, спорт, денсаулық сақтау, жастар ісі және т.б. мәселелер бойынша алты мамандандырылған комиссия белгіленді.

Павлодар облысының әкімі Асайын Байханов жаңа сайланған мүшелермен алдағы бірлескен жұмысты талқылауды жоспарлады. Ол ең алдымен кеңес мүшелерінен инфрақұрылым мен әлеуметтік нысандардың құрылысын қадағалауды талап етті.

– Биылғы жылға жоспарлаған жаңа бастамалардың қатарында бассейндер, мектептер, Ертістен өтетін көпір құрылысы, әлеуметтік нысандарды күрделі жөндеу, трамвай жүйесін жаңғырту, екі жаңа зауыттың ашылуы мен маңызды мерекені атап өту бар, – деп еске салды облыс әкімі. – Бүгінде қоғам мемлекеттік органдардың жұмысына жоғары талаптар қойып отыр. Қоғамдық кеңестің мүшелері – халықтың мұң-мұқтажын ашық айта алатын, қоғамның ой-пікірін билікке жеткізе алатын қауым болуы тиіс. Сондықтан, тұрғындарымыздың мүддесін қорғап, олардың үмітін ақтау – біздің басты міндетіміз.

Асайын Байханов сайланған өкілдермен сындарлы ынтымақтастыққа сенім артып, өңірдің дамуы жолындағы жұмыстарына сәттілік тіледі.

Фото: «AMANAT» партиясы