Биылғы жылдың 10 айында өңірде 80-нен астам автокөлік өрті тіркелді – бұл өткен жылдың осындай кезеңімен салыстырғанда көп болып отыр, деп хабарлайды @Pavlodarnews.kz тілшісі.

Павлодар қаласы ТЖ басқармасы бастығының орынбасары Тілекжан Ғалямовтың айтуынша, өрттің негізгі себебі – суық мезгілде көлікті дұрыс пайдаланбау. Күн суығанда көптеген жүргізушілер қозғалтқышты жылыту үшін ашық отты қолданады, сертификатталмаған электр құрылғыларын пайдаланады және өрт қауіпсіздігі ережелерін елемейді.

– Суық түскен кезде көлік иелері көбінесе қозғалтқышты синтетикалық материалдармен қаптайды. Коллектор қызығанда бұл материалдар оңай тұтанады, – дейді маман. – Сондай-ақ өрттің жиі себебі – электр сымдарының қысқа тұйықталуы. Бұл отын жүйесіндегі ақаулардан да туындауы мүмкін. Шлангінің жарылуы, бензиннің, дизельдің немесе газдың ағуы қозғалтқыштың қызыған бөлігіне түсіп, өртке әкеледі.

Өрттің біраз бөлігі сертификатталмаған орталықтарда орнатылған газбаллонды қондырғылары бар көліктерге тиесілі. Орнату жұмысына үнемдеу көбіне қайғылы жағдайға әкеледі.

Оның айтуынша, газ жабдығы тек мамандандырылған мамандармен орнатылып, қызмет көрсетілуі тиіс. Барлық қосылыстар мен фитингтерді, әсіресе қыс маусымы алдында, үнемі тексеріп, қатайтып отыру қажет.

Өрт сөндірушілердің еске салуынша, жол қозғалысы ережелеріне сәйкес әрбір көлік жарамды өрт сөндіргішпен жабдықталуы керек. Бұл шағын өртті өрт сөндірушілер келгенге дейін-ақ сөндіруге мүмкіндік береді.

– Егер өрт қала ішінде болса, көп жағдайда ТЖ бөлімшелері дер кезінде келіп, көлікті құтқарып үлгереді. Ал елді мекендерден тыс жерлерде көлік көбіне толығымен жанып кетеді, – дейді Тілекжан Ғалямов.

«Fit Service» техникалық қызмет көрсету станциясының шебері Мүслім Қолымбаев көлік иелеріне қарапайым қауіпсіздік шараларын сақтауды ұсынады:

• Коллектор маңында шүберек пен бөтен заттарды қалдырмау;
• Аккумулятор клеммаларының және қосылыстардың мықтылығын қадағалау;
• Сымдардың оқшауламасын тексеру – ол «қолмен оралған» немесе тек изолентаға оралған болмауы керек;
• Газбаллон жүйесін уақтылы қызмет көрсетіп, сүзгілерді жылына кемінде екі рет ауыстыру;
• Бензин иісінің пайда болуы – отынның ағуын білдіретін белгі болуы мүмкін.

Сондай-ақ мамандар тағы бір жиі кездесетін өрт себебіне назар аударады – темекі тұтатқыш арқылы қосылатын жылыту жамылғыларын пайдалану. Көптеген жүргізушілер қозғалтқышты іске қосып, жылыту жүйесін қосулы қалдырып, үйге шай ішуге кетеді. Бұл кезде тізбектің қызып кетуі өртке себеп болуы мүмкін.

Құтқарушылар мен ТЖО мамандары көлікті қысқа алдын ала дайындап, тек сертификатталған құрылғыларды қолдануға, электр сымдары мен отын жүйесінің жарамдылығын үнемі бақылауға және әрдайым жұмыс істейтін өрт сөндіргішті өзімен бірге ұстауға кеңес береді.