Бастама мектеп партасынан алғашқы жұмыс орнына дейінгі аралықта әр балаға жеке сүйемелдеу көрсетуді көздейді, деп хабарлайды @Pavlodarnews.kz тілшісі.

Қалалық №6 орта мектепте «AMANAT» партиясы жанындағы Әйелдер қанатының бастамасымен ерекше білім беру қажеттіліктері бар балалардың ата-аналарымен депутаттардың көшпелі кездесуі өтті. Іс-шара «Кедергісіз келешек» жобасы аясындағы «Шексіз мүмкіндіктер» пилоттық қосалқы жобасының іске қосылуына арналды.

– 2026 жылғы наурыздан бастап жүзеге асырыла бастаған жоба 9 және 11-сынып түлектерін әлеуметтік және кәсіби тұрғыда бейімдеуге бағытталған. Ол тек мамандық алуды емес, сонымен қатар кейінгі кепілді жұмысқа орналастыруды көздейді. Партия білім беру ұйымдары, жұмыс берушілер мен мемлекеттік органдар арасындағы өзара байланысты үйлестіруші ретінде әрекет етеді, – деді «AMANAT» партиясы облыстық филиалының баспасөз қызметі.

Мамандардың айтуынша, жоба аясында түлектердің бірыңғай базасы құрылып, әр балаға кәсіби бағдардан бастап колледжге түсуге дейін жеке сүйемелдеу көрсетіледі. Сондай-ақ оқу орындары мен кәсіпорындар арасындағы өзара іс-қимыл жүйесі жолға қойылады.

Кездесуге Света Абдраманова, Александр Толмачев және қалалық мәслихат депутаты Ольга Андрющенко қатысты. 

– Бұған дейін депутаттар ерекше білім беру қажеттіліктері бар студенттер оқитын колледждерде болып, енді мектептердегі жағдаймен танысуда, – деп атап өтті партиялықтар.

Кездесу барысында ата-аналар өзекті мәселелерді көтерді. Атап айтқанда, Диана Кусманова педагог-ассистенттердің мәртебесін арттыру және жалақысын қайта қарау қажеттігін айтты.

– Бүгінде мектепте 600-ге жуық оқушы білім алады, оның 120-сы – ерекше білім беру қажеттіліктері бар балалар. Оларға арнайы бағдарламалар мен мамандардың қолдауы қамтамасыз етілген, – делінген хабарламада.

Жоба ерекше балаларды қолдаудың жүйелі моделін қалыптастыруға бағытталған – мектептен бастап алғашқы жұмыс орнына дейін.