Павлодарда жылыту маусымына дайындық қалай жүріп жатыр?
Қала әкімі аппараттық кеңес өткізіп, оның қорытындыларымен Instagram парақшасында бөлісті, деп хабарлайды @Pavlodarnews.kz тілшісі.
Хасар Хабылбеков ең алдымен ұжымға қалалық білім беру бөлімінің жаңа басшысын таныстырды.
– Тимур Нұркешовтің бұл салада 20 жылдан астам еңбек тәжірибесі бар. Білім беру бөлімінің жаңа басшысына сеніп тапсырылған жүйедегі жұмыстың сапасын арттыруға және өскелең ұрпақтың тәрбиесіне баса назар аудару жүктелді, – деп жазды қала басшысы әлеуметтік желіде.
Сондай-ақ алқалы жиында алдағы жылыту маусымына дайындық мәселесі талқыланды.
– «Павлодар жылу желілері» ЖШС жалпы ұзындығы 3,1 шақырым болатын инженерлік желілердің 11 учаскесінде күрделі жөндеу жүргізіп жатыр. Барлық жұмыстар кестеге сәйкес атқарылуда. 1 қыркүйекке дейін тұрғын үйлердің толықтай жылыту маусымына дайын болуын қамтамасыз етуді тапсырдым, – деді әкім.
Тағы бір маңызды мәселелердің бірі – жер қазу жұмыстарынан кейінгі абаттандыруды қалпына келтіру. Хасар Хабылбеков бұл бағыттағы бақылауды күшейтуді тұрғын үй инспекциясына және жергілікті полиция қызметіне жүктегенін атап өтті.
Посмотреть эту публикацию в Instagram
Естеріңізге сала кетейік, өңір жолдарына жүргізілген тексерулер барысында мыңдаған ақау табылды. Жолдарды күтіп-ұстау ережелерін бұзғаны үшін 155 лауазымды және заңды тұлға әкімшілік жауапкершілікке тартылып, ірі көлемде айыппұлдар салынды. Павлодар қаласындағы абаттандыруды бұзған мердігер ұйымға 1,1 миллион теңгеден астам айыппұл салынды.
