Тәртіп сақшылары азаматтарға жол ережелерін қатаң сақтау, жолда сергек және мұқият болу туралы ескертеді, деп хабарлайды  @Pavlodarnews.kz тілшісі.

Облыстық полиция департаменті баспасөз қызметінің мәліметінше, Сәтбаев көшесінде жүргізушісі қауіпсіздік белдігін тақпаған «Тойота» маркалы автокөлігі тоқтатылды. Құқық бұзушы әкімшілік жауапкершілікке тартылып, 5 АЕК мөлшерінде айыппұл салынды.

– Жол қозғалысының кейбір қатысушылары адам денсаулығы мен өмірін сақтауға көмектесетін қауіпсіздік белдіктерін тағудың маңыздылығын толық түсінбейді. Қауіпсіздік белдігі қауіпсіз жүрудің ең қарапайым және тиімді жолы, соқтығысу кезінде өлім қаупін 90% дейін төмендетеді, – дейді Павлодар облысы полиция департаменті жергілікті полиция қызметінің бастығы Қуаныш Мұстафинов.

Жыл басынан бері өңірде жолаушылар мен жүктерді тасымалдау, қауіпсіздік белдіктерін немесе мотошлемдерді пайдалану жөніндегі талаптарды сақтамағаны үшін шамамен 6542 азамат жауапқа тартылды.