Тәртіп сақшысы су тасқыны басталғаннан бері ауыл тұрғындарына көмектесіп жүр, деп хабарлайды @Pavlodarnews.kz тілшісі. 

ҚР Ішкі істер министрлігі баспасөз қызметінің мәліметінше, Ақтоғай ауданының учаскелік полиция инспекторы Тұрсынғали Ибраев су тасқынынан құтқару жұмыстарына белсенді қатысып, су басқан үйлерден ондаған адам мен жануарларды алып шықты.

– Бірінші күні мен Жалаулы ауылының тұрғындарына көмектесіп, оларды туыстарына, қауіпсіз жерге апардым. Жұбайы, 4 баласы және немересімен бірге тұратын Серік Ахметовтің үйі зардап шекті. Ойланбастан мен оларды үйіме алып келдім, алты күннен бері менің үйімде тұрып жатыр. Адамдар қауіпсіз жерде, біз азаматтардың мүлкінің сақталуын қамтамасыз ету үшін патрульдеуді жалғастырамыз, – дейді ол. 

Өз кезегінде ауыл тұрғындары полиция қызметкерлеріне алғыстарын білдіріп, су тасқынының алғашқы күндерінен бастап учаскелік инспектордың тұрғындарға көмегін аямағынын атап өтті.

– Алдымен ол адамдарды су басқан үйлерден шығарып, содан кейін малды қауіпсіз жерге айдады. Біз белгілі бір кезеңде бәрін жоғалттық. Ол бізді тыныштандырды, нұсқау берді. Эвакуациялық жұмыстар аяқталғаннан кейін, қазір күн сайын еріген қар суы басқан үйлер мен учаскелерді аралап, патрульдейді. Ауылда су тасқынына қарсы жұмыстар басталған кезде ол алғашқылардың бірі болып ауылға бет алды. Учаскелік полиция қызметкері осы күндері әріптестерімен бірге су басқан үйлерден адамдарды қызметтік көлікпен эвакуациялады, – дейді ауыл тұрғындары.

Павлодар облысында су тасқынына қарсы жұмыстарға 210 полиция қызметкері мен 79 қызметтік техника жұмылдырылған. Аудандарда полиция қызметкерлері қауіпсіздікті қамтамасыз ету бойынша жұмыс жүргізіп жатыр. Эвакуацияланған елдімекендерде азаматтардың мүлкін қорғау үшін тәулік бойы кезекшілік белгіленді. Жергілікті атқарушы органдар, полиция және төтенше жағдайлар органдары су басқан объектілерден су шығару және адамдарды құтқару бойынша кешенді шаралар қабылдап жатыр.