Спортшы соңғы белдесуде Жамбыл облысының балуанына жол берді, деп хабарлайды @Pavlodarnews.kz.

Астана қаласында белбеу күресінен Қазақстан чемпионаты өтті. Жарыс 23 жасқа дейінгі ерлер арасында өтіп, елдің түкпір-түкпірінен іріктелген спортшылар қатысты. Аталмыш үлкен жарысқа Марғұлан университетінің студенті Жәнібек Джаухаев қатысып, күміс жүлдеге ие болды. Жәнібек боз кілемде 62 келі салмақ дәрежесінде белдесіп, өз мықтылығын сынға салды.

– Жарыста Атырау, Жамбыл облыстарының және Астана қаласының спортшыларымен төрт рет белдестім. Финалда Жамбыл облысының балуанына жол бердім. Алдағы уақытта Атырау қаласында Қазақстан Республикасының кубогы өтеді, сол жарыста есемді қайтарамын деп ойлаймын, – деді Жәнібек Джаухаев.

Жәнібек өткен жылы Қазақстан чемпионы атанған. Одан бөлек ересектер арасында қола медаль иегері.

Жәнібектің жаттықтырушысы – Марғұлан университетінің оқытушысы Қайрат Баязитов.