Инновациялық Еуразия университетінің өкілдері Италияның жоғары оқу орындарымен және бизнес құрылымдарымен бірнеше келісімге қол қойды, деп хабарлайды @Pavlodarnews.kz тілшісі.

ИнЕУ баспасөз қызметінің мәліметінше, бұл студенттер үшін академиялық ұтқырлық, қос дипломды бағдарламалар және Еуропада тағылымдамадан өту мүмкіндігін ашады.

Жоғары оқу орны делегациясының Италияға жасаған іссапары мазмұнды әрі нәтижелі болды. Алғашқы маңызды қадамдардың бірі – Неаполитандық Парфенопе университетімен ынтымақтастық туралы меморандумға қол қою. Бұл келісім студенттер мен оқытушыларға халықаралық ғылыми жобаларға қатысуға және академиялық алмасу бағдарламаларына қосылуға мүмкіндік береді.

– Біз жемісті ынтымақтастыққа үміттенеміз және италиялық университетпен жасалған келісім ірі халықаралық жобаларға серпін береді деп сенеміз, – деп атап өтті Неаполитандық Парфенопе университетінің ректоры.

Сонымен қатар, ИнЕУ оқытушылары мен ғалымдары үшін итальяндық басылымдарда ғылыми мақалалар жариялау мүмкіндігі ашылды. «Guida» қорының қолдауымен жасалған келісім қазақстандық зерттеушілерге жетекші халықаралық журналдарда өз еңбектерін жариялауға жол ашады.

Тағы бір маңызды бастама – ИнЕУ студенттерінің Италияда тағылымдамадан өтуі. Неаполь қаласында өткен кездесуде ИнЕУ бақылау кеңесінің төрағасы Шыңғыс Мәкенов университеттің кәсіпкерлік және білім беру саласындағы жобалары туралы айтты. Еуропалық серіктестер университет студенттерімен ынтымақтастық орнатуға қызығушылық танытты.

– Италиялық әріптестеріміз біздің жобалар мен зерттеулерге, сондай-ақ ғылым саласындағы тәжірибе алмасуға үлкен қызығушылық білдірді, – деп атап өтті ИнЕУ бақылау кеңесінің төрағасы Шыңғыс Мәкенов.

Сонымен қатар, ИнЕУ «Militerni» институтымен ынтымақтастық туралы меморандумға қол қойды. Бұл келісім аясында студенттер мен оқытушылар ғылыми-зерттеу жұмыстарында тәжірибе алмасып, бірлескен семинарлар, конференциялар мен ғылыми жобалар ұйымдастырады. Сондай-ақ, италиялық әріптестер биоэтика саласындағы тәжірибелерімен бөлісуге дайын.

ИнЕУ делегациясының сапары университеттің халықаралық стандарттарға сай дамуына үлкен қадам болды. Жасалған келісімдер студенттерге жаңа мүмкіндіктер ашып, олардың халықаралық ғылыми жобаларға қатысуына, шетелде білім алуына және тәжірибеден өтуіне жол ашады. Еуропалық тәжірибе жақын арада Павлодар университетінің қабырғасында жүзеге асырылмақ.