Павлодарлық құтқарушылар зияткерлік ойында үздік атанды
Облыстық кітапханада «Mi trend» зияткерлік квизінің төртінші кездесуі өтті, деп хабарлайды @Pavlodarnews.kz тілшісі.
Ойынның іріктеу кезеңінде жеңіске жеткен командалар келесі кезеңге өтеді.
– Іс-шара қазақ халқының тарихын, дәстүрлерін, әдет-ғұрпын, өнерін, әдеби мұрасын насихаттау, сондай-ақ жастардың танымдылығын арттыру, алынған ақпаратты қысқа мерзімде іздеуге, зерделеуге ұмтылу, логикалық ойлауды дамыту мақсатында өткізілді, – деді кітапханада.
Зияткерлік ойынның осы кезеңіне Павлодар қаласының полиция басқармасының «Рух» командасы, облыстық ТЖД «Құтқарушылар» командасы, ІІМ оқу орталығының тыңдаушылары арасынан «Қыран» және «Сұңқар» командалары қатысты.
Ойын қорытындысы бойынша «Құтқарушылар» командасы жинаған ұпайлары бойынша бәрінен озып, бірінші орынға ие болып, келесі кезеңге өтті.
