Ең көп зардап шеккендер – жасы елуден асқан әйелдер, деп хабарлайды @Pavlodarnews.kz тілшісі.

Облыстық полиция департаменті баспасөз қызметінің мәліметінше, цифрлық алаяқтық бүгінде қоғам үшін ең өзекті қауіптердің бірі болып отыр. «Банктен» қоңырау шалу, «арзан бағамен сату» туралы хабарландыру немесе «кепілдендірілген жобаға» инвестиция салу сынды ұсыныстардың барлығы алаяқтық болуы мүмкін.

Биылғы жылдың басынан бері өңірде интернет-алаяқтықтың 1205 дерегі тіркелді.

– Талдау көрсеткендей, зардап шеккендердің ең үлкен үлесі 50-59 жас аралығындағы адамдарға тиесілі. Бұл топта әйелдер жиі зардап шегеді, олардың саны 800-ге жетсе, ер адамдар саны шабуылдаушылардың жартысына жуық. Қазіргі уақытта облыс тұрғындары ойдан шығарылған «көмекшілерге» сеніп, қорқыту, эмоционалдық қысым және тез пайда уәделеріне негізделген схемалардың құрбаны болып, шамамен үш миллиард теңгеден айырылды, – деді киберқылмысқа қарсы іс-қимыл басқармасының бастығы Асхат Әбетжанов.

Оның айтуынша, онлайн-алдаудың кең тараған тәсілдеріне тауар мен қызмет туралы жалған онлайн-хабарландырулар, банктер мен құқық қорғау органдарының атынан хабарласу, сондай-ақ түрлі «инвестициялық жобаларға» қаржы салуды ұсыну жатады.

Полиция тұрғындарға алаяқтардың қақпанына түспеу үшін банктен, мемлекеттік органдардан немесе инвестициялық компаниялардан түскен қоңырауларға сенбеуді, карта деректері, парольдер, SMS-кодтар мен кодтық сөздерді ешкімге бермеуді, бөгде адамдардың өтініші бойынша телефонға қолданба орнатпау керектігін ескертеді. Сондай-ақ бейтаныс сайттар мен тексерілмеген сатушыларға алдын ала төлем жасамауға, заңдылығы күмәнді жобаларға соқыр инвестиция салмауға, хаттар мен мессенджерлердегі күдікті сілтемелерді ашпауға және шоттарды үнемі тексеріп, есептен шығаруларды бақылауға кеңес береді.

Еске сала кетейік, павлодарлықтар алаяқтардың арбауына түспеу үшін қаржылық сауаттылық пен «иммунитет» қалыптастыруға бағытталған меморандумға қол қойды. Депутаттар мен экономикалық тергеу қызметкерлері тұрғындарды алаяқтық схемалардан сақтандыру үшін ақпараттық-түсіндіру жұмыстарын күшейтуді жоспарлап отыр. Соңғы жылдары өңірде бірнеше қаржы пирамидасы жойылып, жүздеген миллион теңге қаржы қайтарылды. Облыстық мәслихат төрағасы Илья Теренченко бұл бастаманы тұрғындармен жүйелі диалог орнатудың маңызды қадамы деп бағалады.