Асайын Байханов Польша Республикасының елшісі Михал Лабендамен кездесу өткізді, деп хабарлайды @Pavlodarnews.kz тілшісі. 

Облыс әкімі баспасөз қызметінің мәліметінше, кездесу мемлекеттік тілде өтті, дипломат қазақ тілін жетік меңгерген. Аймақ басшысы Асайын Байханов өңірдің индустриялық әлеуеті туралы айтты. Тараптар инвестициялық ынтымақтастықты, сондай-ақ, мәдени-гуманитарлық байланыстарды дамыту мәселелері бойынша пікір алмасты. 

Павлодар облыстық «Полония» поляктар қоғамы мәдени қарым-қатынастың маңызды элементі болып табылады. Аймақтағы ең белсенді этномәдени бірлестіктердің бірі «Полония» қоғамының құрылғанына биыл 30 жыл толады. Өз кезегінде Михал Лабенда білім, мәдениет, экономика саласындағы екіжақты қатынастарды дамытудың маңыздылығын атап өтті. 

– Біздің өңірлеріміз ұқсас, бізде де Павлодар сияқты индустриалды дамыған қалалар бар. Польшада ынтымақтастыққа мүдделі болуы мүмкін көптеген өндірістер бар, – деді Михал Лабенда. 

Бүгінгі таңда Павлодар облысында поляк тарапының қатысуымен төрт бірлескен кәсіпорын жұмыс істейді. Олар – «ZUMIR KZ» ЖШС, «Металлоконструкция-ПВ» ЖШС, «Интер-Универсал» ЖШС, «ASV Management» ЖШС. 

Кездесуде білім беру, академиялық ұтқырлық аясында студенттер мен оқытушылар үшін тағылымдамаларды ұйымдастыру мәселелеріне ерекше назар аударылды. 

Асайын Байханов Лабенда мырзаның қазақ тілі мен мәдениетін жетік меңгергенін атап өтті. 

– Сіз қазақ тілінде ана тіліңіздің деңгейінде сөйлейсіз және бұл құрметке лайық, – деді облыс әкімі.

Аймақ басшысы біздің өңірге деген қызығушылығы үшін алғысын білдіріп, бірлескен жобаларды іске асыру үшін ынтымақтастыққа дайын екендігін жеткізді. 

Кездесу соңында Асайын Байханов елшіге ұлы ақын және философ Мәшһүр Жүсіптің 165 жылдығына орай шыққан көп томдық шығармалар жинағын сыйға тартты. Онда ұлы ойшылдың өлеңдері мен дастандары жинақталған. 

Фото: Валерий Бугаев