Қиялдарына ерік берген аналар сәбилердің арбаларын түрлі тақырыпта әсемдеді, деп хабарлайды @Pavlodarnews.kz.

Раджа пілі, Мелифисента каретасы, зеңбірек патшасы және тағы басқа  кейіпкерлер таңдалды. 

Өмірлік қиын жағдайға тап болған жалғызбасты әйелдерді қолдау жөніндегі өңірлік қоғамдық қордың маманы Әсел Әбішеваның айтуынша, арбалар шеруі жыл сайын өтеді. Бүгінгі мереке қордың құрылуының 10 жылдығымен тұспа-тұс келді.

– Шараға қатысуға ниет білдірген 14 әйел шеруге қатысты. Біздің қордың достарының арқасында ешкім сыйлықсыз кеткен жоқ, барлығына сыйлықтар берілді, – деді Әсел Әбішева.

Бірінші орынды Чебурашка арбасы алды, екінші орынды «Эльф ертегісі», үшінші орынды «Көк трактор» иеленді. Шеруге қатысушылардың барлығы дипломдар, ақшалай және заттай сыйлықтармен марапатталды.