Мектеп оқушысы құтқарушылармен бірге тәжірибе жинақтауда, деп хабарлайды @Pavlodarnews.kz.

Шарбақты ауданы №2  негізгі жалпы білім беру мектебінің 8 «А» сынып оқушысы Александр Кравченконы «қолы алтын шебер» деп атап кеткен. Оның қатарластары виртуалды әлемге әуес болып жүргенде, ол нақты іспен айналысып, адамдарға пайда келтіруді таңдаған. Ол — батыл, мейірімді, ашық мінезді, жауапкершілікті терең сезінетін оқушы және жүрегінде қоғамға қызмет етсем деген шынайы ниет жатыр. 

Александрдың Төтенше жағдайлар қызметіне деген қызығушылығы жай әуестік емес. Ол қауіпсіздік ережелерін меңгеріп қана қоймай, өрт кезінде ұйымдастырылатын нақты шығуларға қатысып, кәсіби мамандарға көмектесіп жүр. Шарбақты ауданының №7 өрт сөндіру бөлімінде оны әрдайым жылы жүзбен қарсы алады. Құтқарушылар оны тәртіпті, іске байыппен қарайтын, үйренуге құштар жас ретінде сипаттайды. Арнайы техниканы көрсе, мамандардың әр қимылын мұқият бақылап, қажет сәтте құрал-жабдық тасуға, өрттен кейінгі ауыр жұмыста көмектесуге дайын тұрады. Бұл — болашақ құтқарушыға тән қасиет.

— Осындай жастарды көргенде, ел үмітін ақтар жас буын өсіп келе жатқанына сенеміз, — дейді аудандық төтенше жағдайлар бөлімінің басшысы, азаматтық қорғау майоры Ақан Дайыров.

Ол Александрдың таңдаған жолы мен табандылығы оны болашақта өз ісінің нағыз маманы ететініне сенімді.

Александрдың еңбекке деген сүйіспеншілігі технология сабақтарында да айқын көрінеді. «Жас дәнекерлеуші» профильді отрядына қабылданған сәттен бастап ол металлмен жұмысқа ерекше қызығушылық танытты. Тәжірибелі ұстаздың жетекшілігімен қауіпсіздік техникасын ғана емес, берік әрі эстетикалық бұйымдар жасаудың қыр-сырын меңгерді. Оның алғашқы ірі жобасы — гүлдерге арналған сәндік бақша арбасы. Ал мектеп кіреберісін безендіріп тұрған металл шыршалар — оның еңбегінің тағы бір жарқын нәтижесі.

– Александр үшін металлмен жұмыс — шын мәніндегі өзін табу сәті болды. Қолмен жасау виртуалды әуестіктен әлдеқайда терең қанағат сыйлайды, — дейді еңбек пәнінің мұғалімі Юрий Бояров.

Александр волонтерлік істерден де қалыс қалмайды. Мектепте жөндеу немесе абаттандыру жұмыстары қажет болса, ол әрдайым алғашқы болып көмекке келеді. Оның мейірімділігі сөзбен емес, нақты іспен өлшенеді.

Фото: облыстық білім беру басқармасы ұсынды