Облыстық прокуратура да тексеріс жүргізуде, деп хабарлайды @Pavlodarnews.kz.

Мерзімі өткен вакциналар бойынша денсаулық сақтау басқармасы басшысының төрағалығымен комиссия құрылды.

– Денсаулық сақтау басқармасының орталықтандырылған қоймасынан жарамдылық мерзімі өткен вакциналар облыстың медициналық ұйымдарына берілмеген, – деді басқармада. – Қазіргі уақытта қызметтік тексеріс жүргізілуде. Ол аяқталғаннан кейін екпе жұмыстарының немқұрайлықпен жүргізілгендігі анықталған жағдайда жауапты адамдарға қатысты сәйкесінше іс-шаралар қабылданады.

Бас прокуратураның тапсырмасы бойынша облыс тұрғындарын вакцинациялау жоспардан тыс тексерілді. Павлодар облысы прокуратурасының қоғамдық мүдделерді қорғау басқармасының аға прокуроры Асхат Атикеевтің айтуынша, вакциналардың 9,5 мың дозасы орталықтандырылған қоймада ұзақ уақыт сақталған, содан кейін жарамдылық мерзімі өтіп кеткен денсаулық сақтау ұйымдарына жіберілген. 

– Мысалы, вакциналар 2023 жылдың 12 сәуірінде берілді, ал олардың жарамдылық мерзімі келесі күні аяқталу керек болатын, – деп атап өтті спикер. – Бұзушылықтар өңірдің мемлекеттік және жеке емханаларында болды.

Сондай-ақ, прокурорлар ата-аналарға қоңырау шалу және тексерулер кезінде бұзушылықтарды анықтады.

– Медициналық ұйымдар бес балаға вакцина салмаған, алайда құжаттар бойынша егілді деп тіркелген, – деді Асхат Атикеев. – Ата-аналар балаларының екпе алғаны туралы бізден, қадағалау органдарынан білді. 

Прокуратура тергеуді әлі аяқтаған жоқ. 

Еске сала кетейік, облыстық прокуратура 21 миллион астам сомаға 9,5 мыңнан астам вакцинаны ұтымсыз пайдалану фактілерін анықтады. Павлодар емханаларының біріне «Пентаксимнің» 135 дозасы препараттың қолданылу мерзімі аяқталған күні берілді. Тағы бір жағдайда мерзімі өткен препараттармен екі бала вакцина алған.