Биылғы жылдың басынан бері облыс аумағында 384 жол апаты тіркелген, деп хабарлайды @Pavlodarnews.kz тілшісі.

Облыстық полиция департаменті баспасөз қызметінің мәліметінше, құқық қорғау органдары жол қозғалысы ережелерін қатаң сақтау мәселесі бойынша қоғамдық көлік жүргізушілерімен кездесу өткізді.

Полицейлер мен жүргізушілер қоғамдық көліктің жұмысын, өңірдегі қозғалысты ұйымдастыру мәселелерін талқылады. Сонымен қатар, жүргізушілерге заңгерлік мәселелер бойынша кеңес берілді.

–  Мұндай кездесулер жол қозғалысына қатысушылардың пікірін естуге мүмкіндік береді. Бұл жолдағы қауіпсіздікке жағдай жасайды. Бүгін көтерілген барлық мәселелер бақылауға алынды және жол қозғалысы қауіпсіздігін қамтамасыз ету мақсатында ескерілді, – дейді департаментте.

Тәртіп сақшылары жүргізушілерді жолаушыларды, әсіресе балаларды тасымалдаумен түсіру кезінде бекітілген талаптарды қатаң сақтауға, жылдамдық режимін бұзбауға және жолда мәдениетті болуға шақырды. Қала көшелерінде жылдамдықты асырған, түрлі маневрлер жасаған автобустар қоғамдық қауіпсіздікке қатер төндіріп, жол-көлік оқиғаларын туындатуы мүмкін.

Айта кетейік, биылғы жылдың басынан бері облыс аумағында 384 жол апаты тіркеліп, 529 адам жарақат алды, 25 адам қаза тапты. Бұл –жай ғана статистика емес, бұл –біреулердің өмірі.