Азамат сол пәтерде тұрмаса да, қосымша төлемнен бас тарту туралы шешімі елеусіз қалды, деп хабарлайды @Pavlodarnews.kz.

Наурыз айында облыстық сауда және тұтынушылардың құқықтарын қорғау департаментіне тұрғындардың бірі жүгінді. Оның айтуынша, ол ұйыммен бейнебақылау жүйесіне сервистік қызмет көрсету туралы шарт жасасқан жоқ. Дегенмен, бұл жүйеге ай сайынғы техникалық қызмет көрсету ақысы бірыңғай төлем құжатына енгізілді. 

– Тұтынушы қосымша төлемге біраз уақыттан кейін ғана назар аударды, бірақ ол бұрын бұл қызметтен бас тартқан. Ол жеткізушіге пәтерде ешкім тұрмайтынын айтып, төлемдерді тоқтатуды сұраған кезде, оның өтініші орындалмады, – деді департаментте.

Жағдайды ескере отырып, департамент «Тұтынушылардың құқықтарын қорғау туралы» ҚР Заңының 8, 12-бабына сәйкес тұтынушының сатушының жұмыс режимін ескере отырып, өзіне ыңғайлы уақытта азаматтық айналымнан алынбаған немесе айналымы шектелмеген тауарды, жұмысты, көрсетілетін қызметті еркін таңдауға құқығы бар екенін түсіндіреді. 

– Өтініш негізінде департамент сотқа дейінгі шағымды жасауға жәрдем көрсетті. Кейіннен тұтынушы сотқа жүгінді. Павлодар қаласының азаматтық істер жөніндегі ауданаралық сотының шешіміне сәйкес бейнебақылау жөніндегі қызметтер кондоминиум объектісін ұстау және оған қызмет көрсету жөніндегі қызметтерге жатпайды. Олар міндетті ай сайынғы төлемдерге қосыла алмайды, – деді департаментте.

Сот ортақ мүлікті ұстауға жатпайтын қосымша шығыстарды меншік иелеріне олардың жазбаша келісімінсіз жүктеуге болмайтынын анықтады. Осыған байланысты бейнебақылау қызметтері үшін ақы төлеу әрекеттері заңсыз деп танылды және ұйым ақшаны қайтаруға міндетті болды.

Егер сіз осындай жағдайға тап болсаңыз, өз құқықтарыңызды қорғау үшін Генерал Дүйсенов көшесі, 9 мекенжайы бойынша не болмаса E-otinish.gov.kz платформасына, e-tutynushy.kz немесе сенім телефоны 8 (7182) 55 10 70 бойынша хабарласа аласыз.