Аңыз бойынша, ғимаратта қысқа тұйықталудан өрт шыққан, деп хабарлайды @Pavlodarnews.kz тілшісі.

«Павлодарэнерго» АҚ Азаматтық қорғаныс және төтенше жағдайлар штабының мамандары тұрақты оқу-жаттығу аясында «Энергетик» профилакторийінде дабыл қағып, іс-шараларды пысықтады. 

– Аңыз бойынша, ғимараттың төртінші қабатында электр сымының қысқа тұйықталуынан өрт шыққан. Барлық қызметкерлер мен демалушылар шұғыл түрде эвакуацияланды. Оқиға орнына ЖЭО-2 және ЖЭО-3 объектілерін қорғау жөніндегі өрт сөндіру бөлімінің және қаланың жедел қызметтерінің мамандары келді. Оқу-жаттығу барысында құтқарушылар «зардап шеккендерді» зембілмен алып шығып, медицина қызметкерлеріне тапсырды, – деді компанияның баспасөз қызметі.

Штаб бастығы Шаймұран Шаймардановтың айтуынша, биыл ЖЭО-2, ЖЭО-3, «Павлодарэнерго» кеңсесі, сондай-ақ көп адам жиналатын демалыс үйлері мен профилакторийлер сияқты әкімшілік ғимараттардағы оқу-жаттығуларға ерекше назар аударылады. Осы жолғы жаттығу кезінде профилакторийден 30-дан астам адам эвакуацияланды.

Мұндай іс-шаралар өрт сөндірушілердің де, объектілер қызметкерлерінің де іс-қимылдарын пысықтау мақсатында өткізіледі. Бұл адамдарға нақты төтенше жағдай болған кезде қалай әрекет ету керектігін, ғимараттан қауіпсіз шығуды үйренуге мүмкіндік береді. Оқу-жаттығу қорытындысы бойынша барлық бөлімшелердің іс-қимылдары оң бағаланды.