Өңір басшысы коммуналдық қызметтердің жұмысын сынға алды, деп хабарлайды @Pavlodarnews.kz тілшісі.

Павлодар облысының әкімі Асайын Байханов жұмыс сапарымен Ақсу қаласына барып, магистральдық жылу желілерінің екі учаскесіндегі жөндеу жұмыстарының барысын тексерді.

Өңір басшысын компенсаторларды ауыстыру мерзімі мен жылу магистральдарын реконструкциялау қарқыны алаңдатты. Асайын Байханов барлық жұмыстарды жылыту маусымы басталғанға дейін аяқтау қажет екенін атап өтті. Бұл тұрғындарды ыстық су мен жылусыз қалдырмау үшін маңызды.

Облыс әкімін екі магистральдың да небарі 2014 жылы пайдалануға берілгеніне қарамастан, іске қосу компенсаторларының бұзылуына байланысты күрделі жөндеуді қажет етіп отырғаны таңғалдырды.

«Теплосервис–Ақсу» КМК директоры Вадим Ковальчуктың айтуынша, ұзындығы 850 метр болатын учаскені жөндеуге 200 миллион теңге қарастырылған.

– Бұл жерде тоғыз жұп сифонды компенсаторды ауыстыру жоспарланып отыр. Аталған учаскеде алты ақау тіркелді, оның төртеуі Әуезов көшесінде анықталды. Бұл – ТМ-2/2 жылу магистралінің жерасты бөлігі, – деді Вадим Ковальчук.

Нысанды аралау барысында Асайын Байханов алматылық зауытпен компенсаторларды дайындауға келісімшарт жасалған-жасалмағанын сұрады. Тексеру кезінде шарттың әлі рәсімделмегені белгілі болды.

– Міне, ең негізгі мәселе осы. Қазір мамыр айы, ал келісімшарт әлі жоқ. Компенсаторларды дайындауға бір жарым-екі ай уақыт кетеді. Зауыт тапсырысты қабылдап, алдын ала төлем алып, жабдықты жасап, кейін оны жеткізуі және орнатуы керек. Неліктен бұл жұмысты қаңтарда немесе ең болмағанда наурызда бастамадыңыздар? – деп сынға алды өңір басшысы.

Коммуналдық қызмет өкілдерінің мәліметінше, Ақсуда гидравликалық сынақтар кезінде 23 ақау анықталған, оның 17-сі орамішілік желілерде болған. Қазір олардың барлығы жойылған. Орамішілік желілердің жалпы ұзындығы 90 шақырымды, магистральдық желілердің ұзындығы 25 шақырымды құрайды.

Екінші нысан Ленин көшесінде орналасқан. Мұнда құны 2,3 миллиард теңгеден асатын жылу магистралін қайта жаңарту жұмыстары жүріп жатыр. Бүгінде 500 метрге жуық құбыр бөлшектеліп, темірбетон науаларын төсеу жалғасуда.

Бұл нысанда мердігерлер 15 жұп компенсаторға алдын ала тапсырыс беріп, қажетті материалдардың барлығын жеткізген.

– Ұзындығы 750 метр бұл магистраль да 2014 жылы салынған. Алайда компенсаторлардың бұзылуына байланысты ақаулар пайда болып, учаскені толық ауыстыру қажеттілігі туындады, – деп түсіндірді мердігерлер.

Олардың айтуынша, бұл магистраль Қамзин көшесін және қаланың басқа да аудандарын жылумен қамтамасыз етеді. Құбыр диаметрін ұлғайту қажет емес, себебі қолданыстағы қуат қазіргі және болашақ тұтынушылар үшін жеткілікті.

Ақсуда жылу желілерінің гидравликалық сынақтары да аяқталды. Тексеру 16 килограмм-күш/шаршы сантиметр қысыммен, он минут бойы жүргізілді.

– Сынақтар үш кезеңде өтті. Нәтижесінде магистральдық желілерде алты ақау анықталды. Олар Ленин, Вокзал және Әуезов көшелерінде тіркелді. Вокзал көшесінде диаметрі 630 миллиметр болатын құбырда қыс мезгілінде де ақаулар болған, – деп нақтылады Вадим Ковальчук.

Асайын Байханов жергілікті билік пен коммуналдық қызметтердің әрекетін қатаң сынға алып, небәрі 12 жыл пайдаланылған құбырларда мұндай көлемде жөндеу жүргізудің тиімсіз екенін айтты.

– Павлодарда 50 жылға жуық уақыттан бері жұмыс істеп тұрған магистральдар бар. Егер компенсаторлар тиімсіз болса, П-тәрізді конструкциялар сияқты техникалық шешімдерді қарастыру керек. Қыста не істедіңіздер? Алдын ала дайындалу қажет еді. Әрекет қайда? Нәтиже қайда? Мен жылу энергетигі емеспін, сіздер – мамансыздар. Мұндай мәселелерді қараша-желтоқсанда талқылау керек, – деді облыс әкімі.

Өңір басшысы 2023 жылы бір құрылыс маусымында шамамен 70 шақырым жылу желісі ауыстырылған Екібастұзды мысалға келтірді.

Асайын Байханов маусым айының басында Ақсуға қайта келіп, компенсаторларды дайындауға келісімшарттардың жасалғанын және жөндеу жұмыстарының қалай жүріп жатқанын жеке тексеретінін айтты.

Жұмыс сапарының қорытындысы бойынша облыс әкімі компенсаторларды ауыстыру мен негізгі жөндеу жұмыстарын тамыз айынан кешіктірмей аяқтауды тапсырды. Осылайша, Ақсу тұрғындары ыстық сумен толық қамтамасыз етіліп, қала жаңа жылыту маусымына тәуекелсіз және тұрақты жағдайда кіруі тиіс.