Әлеуметтік медициналық сақтандыру қоры жиі қойылатын сұраққа жауап берді, деп хабарлайды @Pavlodarnews.kz тілшісі.

Павлодар облысы бойынша Әлеуметтік медициналық сақтандыру қорының филиалының мәліметінше, жұмыс істемейтін және жеке кәсіпкер ретінде тіркелмеген жүкті әйелдер міндетті әлеуметтік медициналық сақтандыру жүйесінде жеңілдік санатына енгізіледі.

Мұндай жағдайда МӘМС жарналарын мемлекет төлейді. Ол үшін жүкті әйел тұрғылықты жері бойынша емханаға жүгініп, жүктілік бойынша есепке тұруы қажет.

Әдетте әйелдерді есепке акушер-гинеколог қояды. Ол үшін МӘМС жүйесінде сақтандырылған мәртебесі болуы керек. Егер мұндай мәртебе болмаса, жүкті әйелді учаскелік дәрігер мен акушер тегін медициналық көмектің кепілдік берілген көлемі аясында есепке қоя алады.

Қор сондай-ақ босанғаннан кейін жұмыс істемейтін және үш жасқа дейінгі баланы тәрбиелеп отырған аналар да жеңілдік санатына жататынын еске салды. Осы кезеңде олар үшін де міндетті әлеуметтік медициналық сақтандыру жарналарын мемлекет төлейді.

Медициналық көмек алу барысында сұрақтар туындаған жағдайда азаматтарға алдымен өз емханасындағы Пациенттерді қолдау және ішкі сараптама қызметіне жүгіну ұсынылады. Мәселе шешілмесе, Әлеуметтік медициналық сақтандыру қорына Qoldau 24/7 мобильді қосымшасы, msqory.kz сайты немесе Telegram желісіндегі @SaqtandyrýBot арқылы өтініш қалдыруға болады.