Үш адам жарақат алды, деп хабарлайды @Pavlodarnews.kz.

Соңғы үш тәулікте павлодарлық жедел жәрдем қызметі 10 жол-көлік оқиғасына шықты. Барлық жағдайда зардап шеккендер тірі қалды. 

Өткен жұма күні Тереңкөл ауылына 20 шақырым қалғанда трассада көлік жылқымен соқтығысқан. Нәтижесінде 22 жастағы қыз зардап шекті. Бригада оны аудандық ауруханаға жеткізді.

15 қарашада Екібастұздағы екі көліктің соқтығысуы салдарынан 18 жастағы жас жігітке көмек қажет болды. Науқас жеңіл жарақаттарымен Екібастұз қалалық ауруханасына жатқызылды.

Ал алдыгүні Ақсу – Курчатов трассасындағы ЖКО кезінде, жеңіл көлік шөп тиелген тіркемеге соғылғанда, үш адам бірден зардап шекті. 36 жастағы әйел жабық бас жарақатын, маңдай бөлігінің және кеуде қуысының көгерген жарақаттарын алды. 5 және 8 жастағы екі қыз қатты зардап шеккен жоқ, тек күйзеліске реакция берді. Барлық адамдар Ақсу қалалық ауруханасына жеткізілді.

– Жол-көлік оқиғалары біздің қызмет үшін басым бағыт болып қала бергенімен, олардың саны тікелей жол қозғалысына қатысушыларға байланысты, – деп атап өтті облыстық жедел жәрдем станциясы басшысының орынбасары Ирина Мищенко. – Егер жүргізушілер мен жаяу жүргіншілер мұқият әрі тәртіпті болса, мұндай шақыртулардың басым бөлігінің алдын ала аламыз. Сондықтан біз әрқашан жолдағы сақтықты ескеруге шақырамыз.

Айта кету керек, павлодарлық «103» қызметінің жүктемесі тұрақты түрде жоғары болып тұр. Өткен демалыс күндері тәулігіне түскен шақыртулар саны 961-ге жетті. Бұл нормадан 30%-дан аса жоғары. Жедел жәрдем қызметінің жүктемесін азайту үшін, поликлиникалар жанынан жұмыс істейтін және төртінші санат бойынша шақыртуларға қызмет көрсететін мобильді бригадалардың жұмыс уақыты 21:00-ге дейін ұзартылды. Сонымен қатар, облыстық «103» станциясы Павлодардан түсетін шақыртулардың басым бөлігіне қызмет көрсету үшін резервтік медициналық бригадаларды тартып отыр. Мысалы, өткен жексенбіде трассалық тірек пункттерінде жұмыс істейтін 8 бригаданың 3-і жұмылдырылды. Соның арқасында барлық шақыртулар белгіленген нормативтерге сәйкес орындалуда.