Малдарға жабайы иттер шабуылдаған, деп хабарлайды @Pavlodarnews.kz.

Әлеуметтік желіде Павлодар ауданы Кемеңгер ауылында малдардың қырылуы бейнеге жазылып, таралып кетті. Ветеринарлар бұл жағдайды тексеру үшін оқиға орнына барған еді. 

– 29 шілдеде түнде Кемеңгер ауылында ұсақ қара мал, атап айтқанда 83 қой қырылды.  Жабайы иттер 15 қойды кеміріп тастады, ал қалған малдар қорыққандықтан тапталып мертікті, – деді облыстық ветеринариялық станциясы басшысының м.а. Ержан Ахметов.

Оның сөзінше, ветеринариялық станцияның қызметкерлері екі жабайы итті ұстады. Олар 10 күндік бақылауда болады. 

– Қырылған малдардан зерттеуге материалдар алынды. Иттердің құттыру белгілері расталса, утилизация мәселесі қарастырылатын болады, – дейді спикер. 

Аталған факт бойынша облыстық полиция департаменті облыстық ветеринарлық инспекциямен  бірге тексеріс жұмыстарын бастады. Себептер анықталып жатыр.