Облыстағы спорт мектептерінің қызметіне де ерекше көңіл бөлінетін болды, деп хабарлайды @Pavlodarnews.kz тілшісі.

Облыстық дене шынықтыру және спорт басқармасының Instagram желісіндегі ресми аккаунтында хабарланғандай, басқарманың жаңа басшысы Азамат Имашев өңірдегі спорт мектептерінің директорларымен кездесті.

«Кездесу ашық диалог форматында өтті. Спорт мектептерінің басшылары Азамат Имашевпен жарыстарға саяхат ұйымдастыру, спорт мектептерінің материалдық-техникалық базасын жақсарту, Республикалық жарыстарды ұйымдастыру және өткізу мәселелерін талқылады», - деп жазады облыстық дене шынықтыру және спорт басқармасының баспасөз қызметі.

Азамат Имашев спортшылардың жағдайын жақсартуға және болашақ олимпиадашыларды тәрбиелеуге қатысты барлық мәселелер басым болатынын мәлімдеді. Сондай-ақ спорт басқармасының басшысы әлеуметтік желі арқылы түскен жеке өтініштерді бақылауға алатынын атап өтті.

26 қарашада облыс әкімінің өкімімен облыстық дене шынықтыру және спорт басқармасының жаңа басшысы тағайындалды.

Бұл қызметке тағайындалғанға дейін Азамат Имашев ҚР Туризм және спорт министрлігі Спорт және дене шынықтыру комитеті төрағасының орынбасары қызметін атқарған.