Креативті индустрия орталығында ортеке өндірісі бойынша бизнес‑жоба таныстырылды, деп хабарлайды @Pavlodarnews.kz тілшісі.

Ортеке – қазақтың көне өнері, онда музыка, би, театр және сәндік қолөнер тоғысады. Көріністің ортасында – ағаштан жасалған тауешкі бейнесі. Ол жіңішке жіппен күйші саусақтарына байланып, әуен ырғағымен қозғалып, секіріп, жануардың қимылын қайталайды. Осылайша, музыка мен пластика біртұтас әсерлі қойылымға айналады.

Жобаның авторы – қолөнер шебері Гүлназ Қадыр.

Шебердің айтуынша, ол Digital Business бағдарламасына қатысып, She’s Next бастамасының төртінші толқыны аясындағы байқауда үшінші орын алған. Бұл санат әйелдер кәсіпкерлігін қолдауға бағытталған.

– «Kazoner Group» өндірістік цехы Павлодарда алты жыл бұрын ашылды. Ол кезде цехымыз небары 17 шаршы метрлік жерде ғана болатын. Кейін маркетингтік науқандар жүргізіп, этноөнімдерге сұраныстың жоғары екенін дәлелдедік. Бүгінге дейін біздің команданы этнодекор өндірушілері ретінде таниды, – дейді Гүлназ Қадыр.

Ортеке Қазақстанның ЮНЕСКО‑ның материалдық емес мәдени мұралар тізіміне енгізілген. Гүлназ Қадыр мен оның командасының мақсаты – бұл өнерді сақтап, ұрпақтан‑ұрпаққа жеткізу.

– Қазақтарда шамамен 90 музыкалық аспап бар, бірақ бүгінде жиырмасы ғана қолданылады. Біз ортекені жиырма бірінші аспап ретінде қайта жаңғыртқымыз келеді. Бұрын ата‑бабаларымыз ортекеде қос немесе үш тауешкі бейнесін жасаған, әзірге біз біреуін ғана дайындаймыз. Алдағы уақытта бейнесабақ әзірлеу жоспарлануда: алдымен адам домбыра тартуды үйреніп, кейін ортекені меңгере алады. Бұл жоба «Шаңырақ» орталығымен бірлесіп жүзеге асады, – дейді қолөнер шебері.

She’s Next бағдарламасы аясында грант ретінде лазерлік кесу станогы сатып алынды. Грант көлемі – екі миллион теңге, оған команда өз қаражатын да қосты. Айта кетейік, Қазақстан бойынша 16 мыңнан астам өтінім түсті: жоба алдымен үздік 30‑дыққа, кейін үздік үштікке енді.

– Димаштың арқасында көпшілік домбыра тартуды үйренгісі келеді. Біз шетелдіктер мен ниет білдіргендерге осы аспапты меңгеруге көмектескіміз келеді. Бір ортекенің бағасы – 35 мың теңге. Тапсырыстар Қазақстанның оңтүстігі мен батысынан түсіп жатыр, – дейді Гүлназ.

Жақын арада өнімдер отандық маркетплейс арқылы сатылымға шығарылады.

Айта кетейік, Павлодар өңірінде ортеке танымалыққа ие. Екі жыл бұрын Павлодардағы жүздеген оқушы ортекені қолданып, музыкалық шығармаларды орындаған еді.

Фото: @qazoner.group