«Достық» шағын ауданындағы жаңа ғимараттан 198 пәтер табысталды, деп хабарлайды @Pavlodarnews.kz тілшісі.

Облыс әкімі Асайын Байханов жаңа тұрғындарға кілттерді салтанатты түрде табыс етті.

– Бүгін біз 2000-шы жылдардан бері нақты кезекте тұрған қала тұрғындарына кілттерді табыстап жатырмыз. Бұл – халықтың әлеуметтік жағынан осал топтары, жетім балалар. Соңғы бірнеше жылда мен қала әкімі болған кезде де көбіңіз жазып, қабылдауға келдіңіздер. Одан кейін бұл мәселенің жобалық-сметалық құжаттамасын дайындау жұмыстарын қажет ететінін талқылап, әлеуметтік тұрғын үй құрылысының қарқынын арттыруды жоспарладық, – дейді аймақ басшысы.  

Асайын Байхановтың айтуынша, биыл 1280 пәтерді пайдалануға беру жоспарланған. Мамыр айында 200 пәтер кілті табысталады.

– Сабырлық танытып, осы уақыт ішінде түсіністікпен қарағандарыңыз үшін алғыс айтқым келеді.  Шаңырақтарыңыз шаттыққа, бақ-береке мен қуанышқа толы болсын, – деді облыс әкімі. 

Аймақ басшысы жалға берілетін тұрғын үй салу тәжірибесі жалғаса беретінін атап өтті. Жоба Қазақстан Республикасы Үкіметі мен Президентінің қолдауымен қаржыландырылады.

Фото: Константин Шелков