Павлодарда еліміздің үздік шабандоздарын анықтайды
![Павлодарда еліміздің үздік шабандоздарын анықтайды](https://pavlodarnews.kz/uploads/images/202311/image_750x_655f2c867e6aa.jpg)
Іріктеуден өткендер Дүниежүзілік көшпенділер ойындарына қатысуға мүмкіндік алады, деп хабарлайды @Pavlodarnews.kz тілшісі.
Қалалық ішкі саясат бөлімі баспасөз қызметінің мәліметінше, 3 тамыз күні сағат 15:00-де қалалық ипподромда бәйгеден Қазақстан Республикасының чемпионатының VІІІ іріктеу кезеңі өтеді.
– Павлодар қаласы күзде өтетін Қазақстан чемпионатының финалында жүлделер мен орындар үшін күресетін Қазақстанның үздік шабандоздарын қарсы алады. Сонымен қатар бұл дода бәйге түрлерінен Дүниежүзілік көшпенділер ойындарына іріктеудің І кезеңі болмақ, – делінген хабарламада.
Еліміздің үздік шабандоздары Құнан бәйге, Топ бәйге, Аламан бәйге және Жорға жарыс бойынша күреседі. Жалпы жүлде қоры – 24 миллион 900 мың теңге.
Сондай-ақ, көрермендер үшін жалпы сомасы 3 миллион теңгені құрайтын жүлделер ұтыс ойыны өткізіледі.
Естеріңізге сала кетейік, V Дүниежүзілік көшпенділер ойындары 8-14 қыркүйек аралығында Қазақстанда тұнғыш рет өтеді. Алматы облысында жамбы атудан ұлттық құраманың оқу-жаттығу жиыны өтіп жатыр. Жамбы атудан ҚР Ұлттық құрамасының бас бапкері Елдос Бадашев бүгінгі таңда жылқыларды спорттық дайындаумен айналысуда.