Негізгі назар жол қозғалысы ережелерінің сақталуы мен мектеп автобустарының техникалық жағдайына аударылуда, деп хабарлайды @Pavlodarnews.kz тілшісі.

Полиция қызметкерлері балаларды тасымалдайтын көліктерге техникалық тексеру жүргізді. Құқық қорғау органдарының негізгі назары жол қозғалысы ережелерінің сақталуына, мектеп автобустарының техникалық жағдайына, қауіпсіздік құралдарының және алғашқы медициналық көмектің болуына аударылды.

Сонымен қатар, іс-шара барысында мектептер маңындағы аумақтар мен оқу орындары жанындағы жол белгілері тексерілді.

– Балалардың жолдағы қауіпсіздігі – біздің басты басымдықтарымыздың бірі. Тексерулер мектеп оқушыларын білім беру ұйымдарына тасымалдау кезінде олардың қауіпсіздігін қамтамасыз ету мақсатында жүргізіледі. Ата-аналар мен педагогтар да балаларға жол қозғалысы ережелерін ескертіп отыруы маңызды. Тек бірлескен күш арқылы балалардың жарақат алуын азайтып, оларға мектепке қауіпсіз жол қамтамасыз ете аламыз, – дейді тәртіп сақшылары.  

Полиция қызметкерлері жүргізушілерді мектептер мен балалар мекемелеріне жақындағанда ерекше сақ болуға, жол қозғалысы ережелерін қатаң сақтауға және балалардың қауіпсіздігіне қамқор болуға шақырады.