Олар «Зеленая роща» шаңғы базасының аумағында өтеді, деп хабарлайды @Pavlodarnews.kz тілшісі.

Бұл туралы облыстық дене шынықтыру және спорт басқармасында мәлімдеді.

Өткен жылдың тамыз айында «Қазақстан биатлоншылар одағы» заңды тұлғалар бірлестігі ведомствоға «Grand Tour Biathlon» турнирінің екінші кезеңін ұйымдастыруға қолдау көрсету туралы өтінішпен жүгінген. Ол үшін барлық қажетті талаптарға сай келетін ату секторы мен спорттық базаны дайындау қажет. Аталған нысан жарыстарға дейін және кейін оқу-жаттығу үдерісінде де пайдаланылатын болады. 

– Бұған дейін спорттық қауымдастық тарапынан «Зеленая роща» шаңғы базасын жабдықтау және қысқы спорт түрлерімен айналысатын балаларға қажетті жағдай жасау, соның ішінде арнайы жабдықталған ату секторын орнату мәселелері бірнеше рет көтерілген, – деп хабарлады басқармада.

Осыған байланысты қараша айында «Қазақстан биатлоншылар одағы» мен облыстық биатлон федерациясының өтініші бойынша «Зеленая роща» аумағында биатлоншыларды даярлауға арналған атыс алаңы жабдықталды.

– Пневматикалық тир секторын орнату үшін учаске тиісті біліктілігі бар жаттықтырушылар мен төрешілердің талдауы негізінде, биатлон бойынша оқу-жаттығу үдерісі мен спорттық жарыстарды өткізу кезіндегі барлық талаптарды ескере отырып таңдалды, – деп толықтырды мемлекеттік органда. – Осыған байланысты аталған аймақтағы бұл учаске қысқы кезеңде сырғанау үшін жабылды. 

Аталған шаңғы базасында №2 БЖСМ, жоғары спорт шеберлігі мектебі және олимпиадалық резервтің мамандандырылған мектеп-интернат-колледжінің екі жүзден астам тәрбиеленушісі оқу-жаттығу сабақтарынан өтеді.

«Биатлон» бөлімінде 9 бен 18 жас аралығындағы 60 адам шұғылданады, олардың 24-і қыздар.

– Тұрақты түрде биатлон мен шаңғы жарыстары бойынша қаланың ашық біріншіліктері мен чемпионаттары, сондай-ақ облыстық және республикалық деңгейдегі жарыстар өткізіледі, – деп атап өтті ведомствода. – Сонымен қатар, жазғы кезеңде шаңғы-роллерлер бойынша жарыстар ұйымдастырылып, спортшыларды жазғы старттарға даярлау жүргізіледі.

Өткен жылы шаңғы базасында шаңғы жарыстары бойынша 10, биатлон бойынша 15 старт ұйымдастырылды. Олардың қатарында қаланың ашық чемпионаттары, облыс чемпионаттары және жасөспірімдер мен қыздар арасындағы ҚР чемпионаты бар.

Басқармада биыл жоспарланған ірі жарыстарды да атады.

Наурыз айында шаңғы жарыстарынан ҚР чемпионаты, «Наурыз» жарысы және Сорокин атындағы жарыс, шілде айында шаңғы-роллерлерден облыстың жазғы чемпионаты, тамыз айында Павлодар қаласының ашық біріншілігі, қыркүйек айында күзгі кросс жоспарланған.

Биатлон бойынша қаңтар айында Павлодардың қысқы кубогы, ақпан айында Павлодар қаласының биатлоннан чемпионаты, наурыз және сәуір айларында Павлодар қаласының биатлоннан ашық біріншілігі өтеді.

Сонымен қатар, тағы бірнеше ірі спорттық іс-шара жоспарланған:

2026 жылғы 1–7 наурыз аралығында 2011–2015 жылы туған ұлдар мен қыздар арасында «Grand Tour Biathlon» турнирінің екінші кезеңі, сондай-ақ 7–22 наурыз аралығында жасөспірімдер мен қыздар арасындағы биатлоннан ҚР чемпионаты және спорт мектептері тәрбиеленушілері арасындағы ҚР чемпионаты болады.

Еске сала кетейік, Павлодарда 10 арнайы жабдықталған сырғанау төбешігі бар:

– Достық шағын ауданы;

– Ю.А. Гагарин атындағы парк;

– Ж. Аймауытов атындағы парк;

– Қалалық бақ;

– Н. Назарбаев даңғылы, 6/3;

– Восточный шағын ауданы;

– Усолка шағын ауданы;

– Орталық жағалау;

– Естай жағынан түсетін жол;

– Металлургтер паркі.

Қала тұрғындарына қауіпсіздік шараларын сақтап, тек ресми түрде жабдықталған сырғанау орындарын пайдалану ұсынылады.