Команда мүшесі Максим Уваровтың айтуынша, олар екі ай бойы жаттығу жасап, жеңіске жетуді мақсат етіп отыр, деп хабарлайды @Pavlodarnews.kz тілшісі.

«ПАВЛОДАРЭНЕРГО» АҚ командасы үстел теннисінен «ОАЭК» АҚ компаниялар тобы арасындағы алдағы Спартакиадада үздік нәтиже көрсету үшін қызу дайындық үстінде. Жарыс 7-8 тамыз күндері Петропавл қаласында өтеді.

– Біз нақты кесте бойынша, тыңғылықты дайындалып жатырмыз. Командалық рух жоғары. Біздің мақсат – тек жеңіс. Павлодарға алтын алып келгіміз келеді. Бұл жарысқа бір жарым, тіпті екі айдан бері белсенді дайындалып жүрміз. Міндет – бірінші орыннан төмен түспеу, – дейді қалалық электр желілері кәсіпорнының Жоғары кернеулі сынақтар қызметінің бастығы, команда мүшесі Максим Уваров.

Максим үшін үстел теннисі – жай ғана спорт емес, өмірінің ажырамас бөлігі.

– Мен тенниспен көп жылдан бері айналысамын. Ресми спорттық дәрежем болмаса да, сенімді ойнаймыз. Бұл – біздің отбасылық дәстүр. Жұбайым Викториямен бос уақытымызды жиі теннис үстелінде өткіземіз. Айналысып жүргеніме ондаған жыл болды. Жай ғана өзіміз үшін ойнасақ та, дәрежеміз жаман емес. Бұл – біз үшін маңызды іс, – дейді ол.

Биылғы Спартакиаданың ұйымдастырушысы – былтырғы жеңімпаз «СЕВКАЗЭНЕРГО» АҚ.

Павлодарлық энергетиктер спорттық дайындық пен бірлік арқасында өз мақсатына жететініне сенімді.