Тұрғындар дәрі-дәрмектің жоқтығына наразылық білдіруде, деп хабарлайды @Pavlodarnews.kz тілшісі.

Instagram әлеуметтік желісінде Павлодар қалалық №3 ауруханасының инсульт бөліміндегі науқастардың емделуіне шағым түсірілген видео тарады. Қала тұрғынының айтуынша, науқастар дәрі-дәрмекті өздері сатып алуға мәжбүр.

– Атам ауруханада сегіз күн жатты. Осы күндердің ішінде бірде-бір дәрігер келмеді. Науқастардың жағдайын тексеріп, қарап шықпайды. Олар өздері дәрігерлерге барып, тексерілуді сұрайды... Ауруханада дәрі-дәрмек жоқ, әр науқас керекті дәрілерді сатып әкеледі, – деп жазды қала тұрғыны.

Аурухана басшылығының сөзінше, мекемеде дәрі-дәрмекке қатысты мәселе жоқ.

– Инсультпен ауыратын науқастарды емдеу қатаң түрде Денсаулық сақтау министрлігі бекіткен клиникалық нұсқаулар мен хаттамаларға сәйкес жүргізіледі. Диагнозға және науқастың жағдайына байланысты емдеу режимі дәрілік терапияны да, оңалту шараларын да қамтуы мүмкін, ал ауруханада дәрі-дәрмектің болуы дәрі-дәрмекпен қамтамасыз ету стандарттарымен реттеледі, – деп түсіндірді ауруханада.

Науқас пен оның туыстары мән-жайды анықтау үшін аурухана әкімшілігіне ресми өтініш жазған жоқ.